Норуот фронунан байыаннай миэдиктэргэ анаан үп-харчы хомуйуута 600 мөл. солк. куоһарда

Норуот фронунан байыаннай миэдиктэргэ анаан тус сыаллаах үп-харчы хомуйуута быйыл иккис сылын туолар. Бу кэм иһигэр 617 мөлүйүөнтэн тахса солкуобай хомулунна.

Үп-харчы хомуйуута мэдиссинэ тэриллэрин атыылаһыыттан саҕаламмыта, оттон бүгүн миэдиктэргэ эвакуациялыыр бөлөхтөр комплекснай көмүскэллэрин уонна кинилэр түргэнник сылдьалларын хааччыйар тэриллэри ыытар кыаҕы биэрэр. Сиринэн байыастары эвакуациялыырга фроҥҥа маннык  тэриллэр бэриллибиттэр: 180 массыына – УАЗ «буханкалар», суһал көмө массыыналара, «Нивалар», 100-тэн тахса мототиэхиньикэ – баггилар, квадроцикллар, бырысыаптаах матасыыкыллар, 200 элиэскэ, 2,5 тыһыынча наһыылка уонна соһор тэрил, 1,5 тыһыынча үрүксээк. Салгынынан эвакуациялыырга 220 сылаас кэнбиэр, оттон уунан – бэнсининэн айанныыр уонна электрическэй мотуордаах 50 оҥочо уонна болуот хааччылынна.

Эвакуациялыыр бөлөхтөргө анаан массыыналарга 550 көмүскүүр кэмпилиэк атыылаһыллан тиэрдилиннэ, онно радиоэлектроннай охсуһуу (РЭБ) тэриллэрэ уонна дроннары булар детектордар киирэллэр, ону тэҥэ суоппардарга анаан 115 көмүскүүр кэмпилиэк бэрилиннэ, онно эмиэ дрон-детектордар, өссө оскуолкаттан харыстыыр көстүүмнэр уонна ачыкылар киирдилэр.

Инники кирбиигэ сылдьар быраастар күн аайы саамай уустук усулуобуйаҕа – ытыалааһын, өстөөх дроннарын атаакаларын аннынан мэлдьи тохтоло суох үлэлииллэр. Кинилэр соруктара – бааһырбыттары кыргыһыы хонуутуттан төһө кыалларынан түргэнник таһааран госпитальга тиэрдии.

Үгүстүк бу улахан тиэхиньикэ сылдьар кыаҕа суох сиригэр буолар. Манна кыра габариттаах эвакуациялыыр тэриллэр уонна анал көмүскэл тэриллэр көмө буолаллар.

«Биһиги чуолаан манна, бу кэмҥэ ханнык тиэхиньикэ наадатын чопчу өйдүүбүт. Биһиги аныгы кэминээҕи эвакуациялыыр бөлөх хайдах буолуохтааҕын туһунан өйдөбүлү оҥорон таһаардыбыт. Бу – улахан тиэхиньикэ сылдьыбат сиригэр үлэлиир, түргэнник сылдьар, көмүскэллээх, бары наадалааҕынан хааччыллыбыт хамаандалар. Кинилэр ытыалааһыҥҥа түбэһэр кутталлара өрүү баар, онон көмүскэл уонна түргэн буолуу – кинилэр үлэлэрин сүрүн усулуобуйалара. Ханнык баҕарар тиэхиньикэ – туттуллан бүтэр матырыйаал, ол эрээри саамай сүрүнэ диэн күн ахсын олоҕу быыһыыр. Уолаттар, байыаннай миэдиктэр, биһиги эһигини кытта бииргэбит!», – диэн Норуот фронун бэрэстэбиитэлэ Юлия Зимова кэпсээтэ.

Үп-харчы хомуйуута салҕанар. Норуот фронун «Байыаннай миэдиктэр» үп-харчы хомуйуутугар «Барыта Кыайыы туһугар!» саайт нөҥүө кыттыһыаххытын сөп.