«Норуот күүһэ — өйүгэр, өйүн күүһэ — тылыгар»

Ийэ тыл, сурук-бичик күнүгэр аналлаах «Норуот күүһэ — өйүгэр, өйүн күүһэ — тылыгар» тэрээһин куруһуоктарбыт иитиллээччилэригэр анаан ыытылынна.

О.П.Иванова-Сидоркевич аатынан Амматааҕы айар сайдыы киинигэр тэрээһин арыллыыта Василий Кочаткин алгыһынан саҕаланна. Алгыс кэнниттэн уһуйааччылар оҕолорго анаан араас остуол оонньууларын ыыттылар.

Сахалыы кинигэлэри аахтардылар, үһүйээннэри Амма нэһилиэгин «Тэтим» түөлбэ олохтоохторо Мира Николаевна Федорова уонна Елизавета Егоровна Макарова кэпсээтилэр. Кинилэр оҕолору айылҕаны харыстыылларыгар, көмүскүүллэригэр ыҥырдылар. Тулалыыр айылҕа күүһүгэр сүгүрүйэн, сиэри-туому тутуһа сылдьалларыгар үөрэттилэр. Үс куттара чөл буоларын туһугар оҕо эрдэхтэриттэн кыһаналларыгар, дьонноругар, төрөөбүт дойдуларыгар туһа дьоно буолалларыгар, төрөөбүт төрүт тылларын умнубакка сахалыы сайа кэпсэтэллэригэр ыҥырдылар, алгыстарын анаатылар.

Салгыы куруһуоктарынан хамаандаҕа арахсан, салайааччыларын кытта квиз оонньууга кытыннылар. Квиз оонньууга «Амма чэчирэ» ансаамбыл иитиллээччилэрэ кыайылааҕынан таҕыстылар. Кинилэр саха тылын, сахалыы ырыалары, төрөөбүт дойдуларын билэллэрин чопчу бигэргэттилэр. Иккис бириистээх миэстэҕэ «Куо» сахалыы иис куруһуога, үһүс миэстэҕэ «Амма чэчирэ» ансаамбыл фольклорнай бөлөҕө таҕыстылар. Тэрээһин Аммалыы оһуохайынан түмүктэннэ. Оҕолор дьиэлэригэр олус астынан, тэрээһиҥҥэ кыттыбыттарыттан үөрэн бардылар.

Александра Егорова,

О.П.Иванова-Сидоркевич аатынан Амматааҕы айар сайдыы киин методиһа.

Косиор Карманов хаартыскаларга түһэриитэ