Норуот маастара Пелагея Соловьева оҕолору уһуйар

Саха сирин олохтоохторо байыаннай дьайыыга сылдьар биир дойдулаахтарбытыгар тиһигин быспакка көмөлөһөллөр. Маннык үтүө санаалаах, амарах дууһалаах дьоммут кэккэтэ хаҥыы турара кэрэхсэбиллээх.

Уус Алдан улууһугар норуот маастара Пелагея Соловьёва оскуола оҕолоругар «Саха волонтердара. Оҕолор» бырайыак чэрчитинэн маастар-кылаастары ыытар. Кини иллэҥ кэмигэр байыастарга харысхал оҥоруутунан дьарыктанар, оҕолору онно уһуйар диэн «Саха волонтердара» хамсааһын иһитиннэрэр.

Пелагея Васильевна – култуура бэтэрээнэ. Кэнники сылларга «Сардаҥа» оҕо уһуйааныгар үлэлээбитэ. Уус Алдан уран-уустарын «Мындыр» уонна «Удьуор утум» кылынан дьарыктанааччылар түмсүүлэрин, «Далбар» үҥкүү бөлөҕүн кыттыылааҕа, «Уран тарбахтар» түмсүү салайааччыта.

Пелагея Васильевнаҕа айымньылаах үлэтин, кыһамньытын иһин «Саха волонтердара» хамсааһын чилиэннэрэ истиҥ махталы тиэрдэллэр.