Норуот синоптига Тускул ханна сүтэ сырытта?

Бу күннэргэ Сибиир эрэгийиэннэригэр 30 кыраадыска диэри итии күн-дьыл турара күүтүллэр.

Бу туһунан ТАСС-ка Арассыыйатааҕы гидрометеорологическай киин научнай дириэктэрэ Роман Вильфанд иһитиннэрдэ:

«Бу Азияттан сылаас салгын маассата көһүүтүн кытта ыкса сибээстээх. Сибиир федеральнай уокуругар икки күн устата итии күн-дьыл турара сабаҕаланар. Новосибирскай уобаласка 28-30 кыраадыс итийиэҕэ, оттон Алтай уобалаһыгар — 30-35 кыраадыстан үрдүк. Бу Туркменистантан тэнийэр итии салгыны сибээстээх».

Оттон норуот синоптигынан биллэр Тускул Саха сиригэр хайдах күн-дьыл туруо диэн билгэлиирий?

— Бу күннэргэ түһэ турар ардах – уйгу-быйаҥ бэлиэтэ. Дьэ, үчүгэй өҥ дьыл кэлээри турар. Өтөрүнэн ыам ыйын саҥатыгар түспэтэх, үүнүүгэ саамай наадалаах сөҥүү кэлэн түстэ. Ыам ыйын 18 күнүгэр Ньукуолун ардаҕа түһүөҕэ. Онон от бөҕө үүнүөҕэ, оҕуруот аһа элбиэҕэ, сир аһа тахсыаҕа.

Биири бэлиэтиэм этэ. Бу түһэ турар сөҥүүнү соторутааҕыта Саха сиригэр кэлбит «зондировщик» сөмөлүөт аҕалар ардаҕын курдук саныыр киһи үгүһэ сөхтөрдө. Ыйытыылара ол эрэ. Кэбис, доҕоттор, итинник санаамаҥ. Бастатан туран, ити сөмөлүөт хас биирдии көтүүтэ мөлүйүөнүнэн үп буоллаҕа. Иккиһинэн, уматыгын ороскуота. Онон дьиҥ ыксаллаах, тыҥааһыннаах кэмнэргэ эрэ туттуллуохтаах сыаналаах көтөр аал хас да күнү быһа тохтоло суох ардаҕы аҕалар соруга суох. Бу Ийэ айылҕа бэйэтин бэлэҕэ. Ол да иһин илгэлээх ардах кэнниттэн тиит көҕөрөн, от ыллыы-ыллыы үүнэн эрэр. Онон ыам ыйын 20 чыыһылатыттан 18-22 кыраадыс сылаас күннэр саҕаланыахтара.

Быйылгы сайын кураанныа суоҕа. Бэс ыйыгар эмиэ элбэх сөҥүүлээх буолуоҕа. Арай Дьааҥы, Халыма-Индигир улуустарыгар улахан куйаас сайын буолар чинчилээх. Аҕыйах хонугунан манна номнуо 22-23 кыраадыс сылыйыаҕа, — диэн сонунун үллэһиннэ норуот синоптига.

«Тускул, эн билгэҕин суохтаатыбыт даҕаны! Ханна бачча өр сүтэ сырыттыҥ? Бу күннэргэ олох «сураҕа суох саһан» хааллыҥ дии?» диэн ыйыппыппар, норуот синоптигын хоруйа маннык буолла:

— «Бэрбэкэй» диэн өбүгэлэрим алааһыгар анаан бултаан, сибиэһэй салгынынан сайа тыынан кэллим. Олох сибээһэ суох сиргэ дуоһуйа сынньанным. Ийэ айылҕабар сылдьан күүс-уох ыллым. Кэлээт, төлөпүөммүн көрбүтүм, «ханна сүттүҥ?» диэн ыйытыы бөҕө кэлбит. Билигин да суотабайым оргуйа олорор. Онон бар дьоммор болҕомтолорун иһин «Саха сирэ» хаһыат саайтын нөҥүө истиҥ махталбын тиэрдэбин».

Чэ, бэрт. Мантан инньэ Тускулбут билгэтин тапталлаах «Тэтим» араадьыйабытыгар истиэхпит, «Саха сирэ» хаһыакка ырытыытын ааҕыахпыт буоллаҕа.