Норуот сомоҕолоһуутун күнүгэр туох тэрээһин ыытылларый?

Сэтинньи 4 күнүгэр Арассыыйаҕа Норуот сомоҕолоһуутун күнүн бэлиэтииллэр. Бу – норуот сомоҕолоһуутун, хардарыта көмөлөһүүтүн уонна күүһүн кэрэһилиир судаарыстыбаннай бырааһынньык.

Бырааһынньык күннэригэр Саха сиригэр кэнсиэрдэр, быыстапкалар, бэстибээллэр, пуорумнар, араас көрсүһүүлэр уонна элбэх ахсааннаах уопсастыбаннай аахсыйалар ыытыллаллар. Биир сүрүн тэрээһининэн Дьокуускайга ыытыллар «Норуот уонна аармыйа сомоҕолоһуута» диэн III Өрөспүүбүлүкэтээҕи Фашизмы утары пуорум буолуоҕа.

Трофейнай бронетехника быыстапката арыллыаҕа, «Улахан этнографическай дьыктаан» X Үбүлүөйдээх Бүтүн Арассыыйатааҕы сырдатар аахсыйата уонна да атын бырааһынньыктааҕы тэрээһиннэр буолуохтара.

Бырааһынньыктааҕы тэрээһиннэр өссө алтынньы саҕаланыытыттан саҕаламмыттара. Ол курдук, алтынньы 1 күнүгэр өрөспүүбүлүкэҕэ «Мин – Арассыыйа олохтооҕобун»Бүтүн Арассыыйатааҕы оҕо култуурунай-сырдатар аахсыйата саҕаламмыта, оттон алтынньы 20 күнүттэн оскуолаларга Норуот сомоҕолоһуутун күнүгэр анаммыт кылаас чаастара, уруоктара, быыстапкалар, күрэхтэр уонна экскурсиялар, маастар-кылаастар ыытыллаллар.

Бүгүн, сэтинньи 1 күнүгэр, Дьокуускайга А.Е. Кулаковскай аатынан Норуоттар доҕордоһууларын дьиэтигэр «Эйэ туһугар норуоттар сомоҕолоһуулара» диэн  ыччат пуорума арылынна. Сэтинньи 1 күнүгэр  Национальнай уус-уран түмэлигэр уонна киин куораттааҕы филиалларыгар аһаҕас ааннар күннэрэ саҕаланнылар.

Сэтинньи 1 күнүгэр Ю.А. Гагарин аатынан Култуура уонна аныгы ускуустуба киинигэр Саха сирин олохтоохторун «Биир ньыгыл Арассыыйа – биир ньыгыл дьиэ кэргэн» диэн билиһиннэрэр бырагыраамаҕа ыҥыраллар.

Сэтинньи 1 күнүттэн 4 күнүгэр диэри култуура уонна ускуустуба тэрилтэлэрэ, бибилэтиэклэр сыл аайы ыытыллар «Ускуустуба түүнэ-2025: Култууралар сомоҕолоһууларыгар – норуот күүһэ» Бүтүн Арассыыйатааҕы аахсыйа былаһааккалара буолуохтара. Сэтинньи 3 күнүгэр Дьокуускай куорат 17-с №-дээх оскуолатыгар гражданственность уруога буолуоҕа.

Норуот сомоҕолоһуутун күнүгэр, сэтинньи 4 күнүгэр, Саха сирин олохтоохторо «Матушка-земля» ырыаны толорууга Бүтүн Арассыыйатааҕы хорунан аахсыйаҕа кыттыахтара.