Таатта улууһун дьаһалтата “Grado” чааһынай архитектура бюрону кытта кэпсэтии түһэрсэн, Ытык Күөл нэһилиэгэр киин болуоссат бырайыагын оҥоро сылдьаллар.
Киин болуоссат Ытык Күөл нэһилиэгин эрэ буолбакка, бүттүүн улууһу хабар суолталаах. Ону ааһан Таатта улууһа сахалары үөрэххэ-сайдыыга сирдээбит чулуу уолаттара төрөөбүт, иитиллибит биһиктэрэ буоларын, норуот чулуу айымньыта олоҥхо эмиэ мантан силис тардарын киэҥ эйгэҕэ бигэргэтэн, улуус брендэ оҥорор соруктаахтар.
Бу бырайыагынан Илин Уһук эрэгийиэҥҥэ ыытыллар куорат эйгэтин тупсаҕайдык оҥорор бырайыактар күрэхтэригэр кыттар баҕа баар. Быйыл үһүс төгүлүн ыытыллар Арассыыйа таһымнаах бу күрэх сыала-соруга дойду устуоруйатыгар суолталаах түбэ сирдэри, кыра куораттары тупсарарга туһуламмыт. Кыайыылаах бырайыак олоххо киириитэ үбүлэнэр. Ол үчүгэйэ диэн, бастатан туран, бырайыак олоххо киирэрэ түргэтиир, иккис курдук, өрөспүүбүлүкэҕэ тастан үп киириитэ ситиһиллэр.
Ханнык баҕарар болуоссат араас хабааннаах тэрээһиннэр ыытыллар эйгэлэрэ, олохтоохтор түмсэр, сомоҕолоһор кииннэрэ буолар. Араас дьон, ол иһигэр кыра оҕолор, доруобуйаларынан хааччахтаахтар, тэҥинэн биир сиргэ тоҕуоруһа мусталларын ол болуоссат уйар кыамталаах, кинилэргэ барыларыгар табыгастаах гына оҥоһуллара эрэйиллэр. Дьон кэлэр, сылдьар тиһигэ быстыбатын туһугар олохтоохтору, туристары угуйар ураты уонна тупсаҕай кыра да, улахан да тутуулардаах буолуохтаах.
Бырайыак дьон олоҕун тупсарарга туһуланар. Онон, бастатан туран, олохтоох дьон баҕата аахсыллар. Ол туһуттан “Grado” архитектордара нэһилиэнньэ санаатын истэргэ, дьоҥҥо-сэргэҕэ тыҥаан турар кыһалҕаны чопчулуурга үлэлэһэллэр. Олохтоохтору кытта көрсүһүү, бырайыактыыр сэминээр, аҥкыата үлэлэрэ тэрилиннилэр. Архитектордар уонна нэһилиэнньэ ситимнэрэ бырайыак оҥоһулларын устатыгар быстыа суохтаах.
Кэлэр 2025 сылга Ытык Күөлгэ Манчаары оонньуулар тэриллэрэ, 2030 сылга үбүлүөйдээх Олоҥхо ыһыаҕа ыытыллара былааннанар. Өрөспүүбүлүкэ таһымнаах сүдү суолталаах тэрээһиннэри көрсө, улуус дьаһалтата олохтоохтор сүргэлэрин көтөҕөр: олорорго, үлэлииргэ, сынньанарга табыгастаах, туристары тардар – сонун, тупсаҕай эйгэни тэринэр. Онон бу бырайыагы сэҥээрэр, ис сүрэҕиттэн ыалдьар, кыһанар дьону кими баҕарар, оҕону, ыччаты, эдэри, эмэни, көхтөөх дьону “Grado” архитектор бюро үөрүүнэн көрсөр.
Табыгастаах сүбэҕит, улуус олоҕун, устуоруйатын туһунан билиигит дьон-норуот туһугар үлэлээтэҕинэ, тус дуоһуйуугут, киэн туттуугут буолан тахсыа. Бэриллэр куйаар кодунан Grado архитектура бюро социальнай ситимнэригэр суруйтаран, хамаанда үлэтин билсиҥ, кэтээҥ, сэҥээриҥ, санааҕытын тириэрдиҥ.
Таатта – саха үрдүк итэҕэлэ үөскээбит сирэ, үөрэх-сайдыы биһигэ диэн бренд оҥорорго норуот өйүн уонна наука ситиһиилэрин холбуоҕуҥ.
Утум Захаров
Ахсынньы 28 күнүгэр өрөбүллээҕи Оһуокайбыт буолла.Быйыл иккис сылын Чысхаан кэлэн алгыстаах оһуокайы таһаарда. Чысхаан оруолун…
Биэс сыллаах тохтобул кэнниттэн Москваҕа тыһыынчанан оҕолорго анаан Кириэмил харыйатын тэрээһинэ ыытылынна. Кинилэр истэригэр Саха…
Бу күннэргэ Горнай улууһун Землячествота саҥалыы тыыннаах тэриллибитэ 10-с үбүлүөйдээх сылын бэлиэтиир. Уопсастыбаннай тэрилтэ үлэтин…
Ахсынньы 26 күнүгэр Бүтүн Арассыыйатааҕы “Полиция Тымныы Моруос Оҕонньоро” аахсыйа саҕаламмыта. Бу суолталаах тэрээһиҥҥэ кыттан,…
Бу күннэргэ Саха сирин талааннаах дьоно хаартан-муустан кэлэн иһэр саргылаах Саҥа дьылы көрсө араас оҥоһуктары…
Дьокуускай куоракка сылаас тохтобулларга оҕолор уруһуйдарын көрүөххэ сөп. Ол курдук, “Доҕордоһуу болуоссатын “ уонна “Центральный”…