Норуоттар доҕордоһууларын дьиэтэ айар сезонун саҕалаата

 Дьокуускайга А.Е.Кулаковскай аатынан норуоттар доҕордоһууларын дьиэтэ 2022-2023 сылларга саҥа сезонун саҕалаата.

Күүтүүлээх тэрээһин иитинэн  национальнай-культурнай түмсүүлэр «Якутия территория единства» быыстапкалара буолла. Манна тарбахтарыгар талааннаахтар уус-уран оҥоһуктара болҕомтону тартылар. «Якутия – наш общий дом» хаартысканан экспозиция бырайыагын туһунан, быстах хомуурга ыҥырыллыбыт дьоҥҥо гуманитарнай көмөнү оҥоруу туһунан иһитиннэриилэр оҥоһулуннулар диэн норуоттар доҕордоһууларын дьиэтин пресс-сулууспата суруйар.

Тэрээһин түһүлгэтигэр мустубут ыалдьыттары СӨ Тас сибээскэ уонна норуоттар дьыалаларыгар миниистири солбуйааччы Сергей Хатылыков, СӨ норуоттарын Ассамблеятын бэрэссэдээтэлэ Александр Подголов, Дьокуускайга «Төрүт эйгэ» община бэрэссэдээтэлэ Екатерина Новикова, «Туган як» («Родные края») татаар норуотун култуураҕа киинин бэрэссэдээтэлэ Игорь Халилов эҕэрдэлээбиттэр. Тэрийээччилэр:  А.Е.Кулаковскай аатынан норуоттар доҕордоһууларын дьиэтэ, СӨ норуоттарын Ассамблеята, «Симэх» НК. Экспозиция норуоттар доҕордоһууларын дьиэтин 1 мэндиэмэнигэр национальнай культуралар галереяларыгар сэтинньи 7 күнүгэр диэри турар.

Маны сэргэ, «Многоцветие дружбы» кинигэ быыстапкатыгар дьон-сэргэ Арассыыйа норуоттарын, кинилэр култуураларын, үгэстэрин, уо.д.а. көрүөхтэрэ. «Созвездие» бибилэтиэкэ сүрүн бибилэтиэкэрэ Людмила Ефимова Саха сирин норуоттарын төрөөбүт тылларын туһунан бэсиэдэни оҥорбут, киэҥ кэпсэтии тахсыбыт.

Салгыы Саха сирин норуоттарын ыччаттарын Ассамблеята «Триколор Содружество» аһаҕас кэпсэтиини тэрийбит. Манна мустубут ыалдьыттар сомоҕолоһуу, Арассыыйа былааҕын, дойдубут туһунан өрө көтөҕүллэн кэпсэппиттэр, санааларын үллэстибиттэр. Былаһаакка ыалдьыттарынан уонна  санааларын көхтөөхтүк үллэстээччилэринэн Дьокуускайдааҕы уу тырааныспарын институтун курсаннара, 15 №-дээх  оскуола үөрэнээччилэрэ, ыччат Ассамблеятын  бэрэстэбиитэллэрэ буолбуттар. Бэриллибит ыйытыыларга хоруйдаабыттар, Арассыыйаҕа дипломатия сайдыытын уонна суолтатын, «Арассыыйа норуоттарын Ассамблеята» уопсастыбаннай түмсүү уонна эрэгийиэннээҕи түмсүү үлэтин-хамнаһын туһунан, уо.д.а. истибиттэр. Ыччат Ассамблеятын бэрэстэбиитэллэрэ тэрийэн ыытар үлэлэрин-хамнастарын сырдаппыттар. Кэпсэтии кыттыылаахтара ураты сүүрээн, сайдыыга дьулуур, дойдуга бэриниилээх буолуу, бииргэ буолар баҕа санаа улахана, үтүө дьыаланы оҥоруу уонна ону элбэтии дьону-сэргэни түмэрин бэлиэтээбиттэр. Санааны үллэстии былаһааккатын А.Е.Кулаковскай аатынан норуоттар доҕордоһууларын дьиэтин исписэлиистэрэ тэрийбиттэр.

Тэрээһини  «Время быть вместе» аахсыйа салҕаабыт. Манна норуоттар доҕордоһууларын дьиэтин үлэтин-хамнаһын туһунан видеонан сырдатыллыбыт. «Единым духом мы сильны» уонна «Во славу дружбы» блоктарынан,  тэрилтэ айар кэлэктииптэрэ кэнсиэрдээбиттэр. Аахсыйа кыттыылаахтарыгар СӨ Тас сибээскэ уонна норуоттар доҕордоһууларыгар миниистир Гаврил Витальевич Кириллин истиҥ эҕэрдэтин тиэрдибит. 2022-2023 сс. айар үлэ сезона саҕаламмытын туһунан А.Е.Кулаковскай аатынан норуоттар доҕордоһууларын дьиэтин генеральнай дириэктэрэ Антонида Николаевна Корякина иһитиннэрбит. Оттон түмүккэ, норуоттар доҕордоһууларын дьиэтин уус-уран самодеятельноһын кыттыылаахтара уонна Олоҥхо тыйаатырын артыыстара «Надежда» ырыаны ньиргиппиттэр. Кинилэргэ тэрээһин кыттыылаахтара бука бары үөрүүнэн кыттыспыттар.

Хаартыскалар норуоттар доҕордоһууларын дьиэтин пресс-сулууспатын тиксэриилэрэ