Норуоттар икки ардыларынааҕы “Азия оҕолоро”  сайыҥҥы бырагырааматыгар успуорт саҥа көрүҥнэрин киллэрдилэр

Күрэхтэһии бырагырааматыгар эбии стендовай ытыыны, саахыматы, үҥкүү успуордун, кикбоксины киллэрдилэр. Ону тэҥэ, “Азия оҕолоро” норуоттар икки ардыларынааҕы кэмитиэтэ киберспорду киллэрэргэ этии көтөхпүт. Ити туһунан 2024 сылга Дьокуускайга ыытыллыахтаах Норуоттар икки ардыларынааҕы VIII сайыҥҥы спортивнай оонньууга бэлэмнэнии уонна тэрийии боппуруостарынан Ил Дархан Айсен Николаевка буолбут мунньахха кэпсэттилэр.

“Быйыл Владивостокка ыытыллыбыт норуоттар икки ардыларынааҕы сайыҥҥы “Азия оҕолоро” оонньуулар уопута уонна кэлэр сыл олунньутугар-кулун тутарыгар Кузбаска буолуохтаах Кыһыҥҥы II оонньууларга бэлэмнэниигэ сыһыан, бу үрдүк таһымнаах күрэхтэһиигэ атын дойдулар интэриэстэрэ улаханын көрдөрөр. Азия дойдуларын баһыйар үгүс ахсаана хааччахтарга кыттыбата. Кэлэр оонньууларга диэри бэлэмнэнэргэ балтараа сыл баар”, — диэн Ил Дархан эттэ.

Айсен Николаев бэлиэтээбитинэн, тэрийэр кэмитиэти РФ бэрэсидьиэнигэр Уһук Илин федеральнай уокурук боломуочуйалаах бэрэстэбиитэлэ Юрий Трутнев салайар.

Бэрэссэдээтэли солбуйааччы Сергей Местников иһитиннэрбитинэн, 40 Азия дойдутуттан, Арассыыйа 7 федеральнай уокуругуттан уонна эрэгийиэниттэн хамаандалар кытталлара былааннанар. Онньууларга кыттааччы уопсай ахсаана 3000 киһи буолуон сөп.

Күрэхтэһиилэри Дьокуускай куорат успуорка эбийиэктэрин 21 былаһааккатыгар ыытыахтара. “Туймаада” стадиону саҥардар былааннаахтар. Ону тэҥэ, уулуссалар ситимнэрин, успуорт, кыттааччылар аһыыр, түһэр сирдэрин эбийиэктэрин өрөмүөннүөхтэрэ.

Айсен Николаев ырытыһыы түмүгэр, Оонньуулары ыытыыга бэлэмнэниини инники күөҥҥэ турар соруктарынан бэлиэтээтэ: эбийиэктэри саҥардыы уонна өрөмүөннээһин, тупсарыы, кыттааччылары түһэрии, логистика уонна аһылык, култуура бырагыраамата, өрөспүүбүлүкэ сүүмэрдэммит хаманадатын бэлэмнээһин.

“Биһиги Азия дойдуларын былааһын толорор уорганнарын кытта ыкса ситимнээхтик үлэлиибит, чуолаан, бэйэлэрин дойдуларыгар успуорка эрэллэри бэлэмниир уонна успуорду сайыннарыынан дьарыктанар дьону кытта”, — диэн “Азия оҕолоро” норуоттар икки ардыларынааҕы оонньуулар кэмитиэтин бэрэсидьиэнэ Владимир Максимов эттэ.

Владимир Максимов этэринэн, Азия дойдуларын олимпийскай кэмитиэтэ Оонньууну төрүттэммит дойдутугар төнүннэрэр быһаарыыны ылыналларын уонна Төрүт олимпийскай кэмитиэт генеральнай ассамблеята “Азия оҕолоро” оонньуу буоларын, оонньууларга сыһыаннаах туох даҕаны хааччах суох буолуоҕун итэҕэппит.

“Азия оҕолоро” норуоттар икки ардыларынааҕы спортивнай оонньуу аан маҥнай 1996 сыллаахха Саха сиригэр тэриллибитэ. Быйыл сайыҥҥы VII оонньуу Владивосток куоракка ыытылынна. СӨ Ил Дархана Айсен Николаев ыйааҕынан, сайыҥҥы VIII оонньуу 2024 сылга от ыйыгар Дьокуускайга буолуоҕа.

Бырагыраамаҕа успуорт 17 булгуччулаах көрүҥэ киирэр, ону тэҥэ, тэрийээччи бырагыраамаҕа 5 эбии көрүҥү киллэрэр бырааптаах.

“Азия оҕолоро” оонньуу Норуоттар икки ардыларынааҕы олимпийскай кэмитиэт, ЮНЕСКО арыалынан уонна Азия олимпийскай сэбиэтин, Арассыыйа олимпийскай кэмитиэтин өйөбүлүнэн, ЮНИСЕФ билиниитинэн тэриллэр.

СӨ Ил Дарханын уонна СӨ Бырабыыталыстыбатын пресс-сулууспата.

Хаартыска: Андрей СОРОКИН, СИА.