Новоленскайдааҕы ТЭС үлэҕэ киирдэҕинэ 460 саҥа үлэ миэстэтэ тэриллиэҕэ

Новоленскайдааҕы  ТЭС тутулларынан сибээстээн, РФ Бырабыыталыстыбатын дьаһалынан, 2024 сылга   «Якутия» ТОР  кыраныыссалара Ленскэй уонна Мииринэй оройуоннарыгар улаатыннарыллыбыта.   Туһааннаах бырайыак олоххо киирдэҕинэ эрэгийиэҥҥэ  460  саҥа үлэ миэстэтэ  тэриллиэҕэ. 

Новоленскайдааҕы  тепловой электро-ыстаансыйа 550 МВт кыамталаах буолуоҕа. Эбийиэги тутуу кэмигэр 1500-чэ саҥа үлэ миэстэтэ тэриллиэҕэ. ТЭС үлэҕэ киирбитин кэннэ  үлэһит  ахсаана 500-чэ киһи буолуохтаах. Ыстаансыйа 2028 сылга үлэҕэ киирэрэ былааннанар.

ТЭС 2042 сылга диэри дойду электроэнергетикатын эбийиэктэрин  генеральнай схематыгар киирэ сылдьар.  Бу схеманы федеральнай бырабыыталыстыба бигэргэппитэ.  Бырайыак  үс  энергоблоктан турар, онон эрэгийиэн эмиэ биир улахан эбийиэгинэн буолуоҕа.  Ыстаансыйа үлэлиирин туһугар  208 км гаас ситимэ итиэннэ  1000 км уот ситимэ тардыллыаҕа. Сүрүн оттук  – Мииринэйтэн 130 км сиргэ баар Орто Ботуобуйатааҕы айылҕа гааһа.

2024 сыллааҕы навигация кэмигэр  6 тыһыынча туонна кэриҥэ тимир  конструкциятын, магистральнай гаас ситимигэр анаан  15 тыһ. турбаны  тиэйэн аҕалбыттара.

«Инвестицияны аҕалыы,  саҥа инвестиционнай бырайыактары олоххо киллэриигэ өйөбүл Уһук Илини сайыннарыы биир сүрүн хайысхатынан буолар», – диэн Бырабыыталыстыба бэрэссэдээтэлин солбуйааччы-РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев эрдэ этэн турар.

«Якутия» ТОР уонна  «Южная Якутия» ТОР резиденнэрин ахсаана 76-ҕа тиийдэ. Ааспыт сыл иһигэр 13 саҥа резидент кэллэ.