Ньукуолуну көрсө – кус кэһиилээх

Күммүт сырылаччы тыган, самаан сайыммыт тигинэтэн тиийэн кэллэ. Саха киһитэ сайыҥҥы күөххэ үктэнэн, кэрэ кэми уруйдуу-айхаллыы көрүстэ.

Ыам ыйын 21 күнүгэр Үөһээ Бүлүү улууһун Мэйик нэһилиэгэр күөх нуоҕай сайыны көрсө Ньукуолун күнүгэр нэһилиэк баһылыга Иван Яковлев салайыытынан булчут хааннаах эр хоһууттара аҕам саастаах дьону эмис куһунан күндүлээн барҕа  махталларын ыллылар. Саха киһитин биир маннык үтүө үгэһэ, булт аһыттан күндүлээһин сыл аайы оҥоһуллар.

Онон соҕотох олорор, ытык кырдьаҕастара кус минньигэс этин, миинин тото-хана амсайан, Саха сирин үрдүнэн бэлиэтэнэр Сайылык күнүн уонна норуокка биллэринэн, самаан сайыҥҥа үктэнэр Ньукуолун үтүө күнүн үөрэ-көтө көрсөллөр.

«Эмис куһунан  кыттыспыт  нэһилиэкпит уопсастыбаннай олоҕор өрүүтүн көхтөөхтүк кыттар эр хоһууттарбытыгар  «Мэйик нэһилиэгэ» муниципальнай тэриллии аатыттан дириҥ махталбытын тириэрдэбит!», — диэн Мэйик нэһилиэгин дьаһалтатын үлэһиттэрэ махталларын этэллэр.