Нуоралдьыма чараҥар, көссүү оҕолоро уонна 450-с юкагир…

«Чолбон» сурунаал балаҕан ыйынааҕы нүөмэригэр:

— «Улуу Кыайыы айымньыларыгар» норуот суруйааччыта Николай Лугинов номоххо киирбит «Нуоралдьыма чараҥар» сэһэнэ;

— эмчит уонна прозаик Буор Булгунньах «Көссүү оҕолоро» кэпсээнигэр олох уустук өрүтүн бэрт дириҥник дьүһүйүүтэ;

— норуот суруйааччыта Сэмэн Тумат «Поэттар хоһооннорун үксүн тобуктарыгар өйөөн суруйаллар …» диэн саҥа бөлүһүөктүү уонна историяҕа сыһыаннаах хоһоонноро;

— бэлиэ суоллаах поэт Арылы Дуйдаах «Хоһоонньут сырыыта оһуохай хаамыыта буолбатах…» диэн саҥа хоһооннорун бөлөҕө;

— грек уонна саха номохторун алтыһыннарбыт Ангелла Попова-Кыраман «Архыай. Улуу тойук номоҕо» буффонада-олоҥхотун түмүктэниитэ;

— «Олоҥхо дойдутун айар түмсүүлэрэ» бырайыакка Таатта улууһун «Уран тыл» түмсүүтүн кыттыылаахтара – Иннокентий Лукачевскай-Силис, Сардаана Андросова, Елена Филатова-Сыгыйык курдук ааҕааччы билэр ааттарын сэргэ, Александра Жулева-Суһума, Розалия Докторова уонна Сардаана Андросова-Дьөҥкүчээнэ;

— Саха драматургиятын соҕотох бэһэ – Сиэн Өкөр олоҕун 65-с хаарын көрсөөрү олорон Утум Захаровка айар үлэтин туймууларын сэһэргиир;

— 450-с юкагир – суруйааччы Семен Курилов тоҕо олоҕун туһунан «Биллиилээх суруйааччылар биографиялара» рубрикаҕа филология наукатын доктора Варвара Окорокова билиһиннэрэр;

— Дьааҥы поэтынан сураҕырбыт Василий Дедюкин туһунан үөлээннээҕэ, филология наукатын кандидата Нина Филиппова ахтар уонна анаарар;

— литературовед Саргылаана Ноева «Чысхаан прозатыгар туора киһи уобараһын» ырытар;

Норуот поэта Моисей Ефимов «Күһүн», «Таммах уу», «Хайҕаммыт куоска» оҕолорго аналлаах хоһоонноро.

Күн – сири, «Чолбон» – саханы сырдатар.

 

Алгыһы кытта «Чолбон» сурунаал