Нуотараҕа оскуола умайда

ЫБММ пресс-сулууспата иһитиннэрбитинэн, алтынньы 17 күнүгэр түүн  02:45  ч. баһаарынай-быыһыыр сулууспаҕа Ленскэй улууһун Нуотаратыгар орто оскуола дьиэтэ умайан эрэрин туһунан иһитиннэрии киирбит.

10 мүнүүтэнэн сэлиэнньэҕэ баар баһаарынай хамаанда тиийбит. Баһаарга ким да эмсэҕэлээбэтэх. Уопсайа   768 кв.м. умайбыт. Билигин баһаар тахсыбыт биричиинэтин уонна хоромньу кээмэйин ааҕаллар.

СӨ Борокуратууратын сорудаҕынан Ленскэй оройуонун борокуратуурата Нуотаратааҕы орто оскуола умайыытынан бэрэбиэркэ ыытар. Миэстэтигэр Ленскэй оройуонун борокуруора таҕыста.

Оскуола икки этээстээх, мас дьиэ. Манна хантараак быһыытынан бэдэрээтчит тэрилтэ өрөмүөн үлэтин ыыта сылдьыбытын туһунан СӨ Борокуратуурата иһитиннэрдэ. Оҕолор өрөмүөн кэмигэр оскуола иннинээҕи үөрэх кыһатыгар үөрэнэ сылдьыбыттар.