Ньурба, Бүлүү улуустарыгар сир аннынааҕы иһэр уу саппааһын буллулар

Саха сирин арҕаа өттүгэр гидрогеологтар сир аннынааҕы иһэр уу саппаастаах саҥа сирдэрин буллулар.  Онон бу источниктартан иһэр уунан Ньурба, Бүлүү улуустарын олохтоохторо хааччыллыахтара.  

СӨ бырамыысыланнаһын уонна геологиятын миниистирэ Максим Терещенко иһитиннэрбитинэн, геологоразведка саамай тыын суолталаах социальнай боппуруоһу — хаачыстыбалаах иһэр уунан хааччыйыыны быһаарар.

Эспиэрдэр этэллэринэн, саҥа булуллубут источниктар сууккаҕа  200 куб.м. ууну биэрэр кыахтаахтар.

2023  сылга Саха сиригэр сир аннынааҕы ууну көрдөөһүҥҥэ, чинчийиигэ  10 мөл. солк. кэриҥэ үп-харчы көрүллүбүтэ. Бүтэһик биэс сылга гидрогеологтар  80-тан тахса саҥа сири буллулар.Туһааннаах үлэлэр Ил Дархан  Айсен Николаев сорудаҕынан ыытыллаллар.