Ньурба дьаһалтата суут быһаарыытынан оҕо оонньуур 18 былаһааккатын өрөмүөннүөҕэ

СӨ Ньурбатааҕы суутун быһаарыытынан  борокуруор этиитэ толорулунна. Ол курдук, Ньурба куорат дьаһалтата сөптөөх үлэни ыыппатаҕа сокуону кэһиинэн билинилиннэ. 2026 сыл бэс ыйын 30 күнүгэр диэри 18 оҕо оонньуур уонна успуорт былаһааккатын көрөргө-истэргэ эбээһинэстэннэ.

Суут быһаарбытынан, Ньурба куоракка оҕо оонньуур уонна успуорт былаһааккаларын реестригэр 31 былаһаакка киирбитэ биллибит. Бу сыл от ыйыгар оройуон борокуратуурата федеральнай сокуон тутуһуллуутун бэрэбиэркэлиир кэмигэр, оҕо оонньуур уонна успуорт былаһааккаларын көрүүтүгэр 18 былаһааккаҕа кэһиилэр тахсыбыттарын булбут.

Ньурбатааҕы оройуон суута куорат дьаһалтатын сөптөөх дьаһалы ылымматаҕын сокуону кэһиинэн билиннэ уонна эһиил бэс ыйын 10 күнүгэр диэри оҕо оонньуур уонна успуорт былаһааккаларын көрөргө-истэргэ уонна хомуйарга сорудахтаата.

Ону таһынан, тэрил үлэлиир туругун уонна эрэбиллээх буолуутун сыаналыыр тиэхиньиичэскэй бэрэбиэркэни ыытарга сорудахтанна. Оонньуур комплекстары өрөмүөннүүргэ уонна көрөргө-истэргэ, алдьаныылары уонна итэҕэстэри туоратарга, сорох чаастарын кырааскатын саҥардарга, ону тэҥэ табаахтыыры бобор туһунан иһитиннэрэр истиэнэлэри уонна бэлиэлэри туруорарга, оҕо оонньуур уонна успуорт былаһааккаларын күрүөлэрин чөлүгэр түһэрэргэ этилиннэ.

Дьыала матырыйаалларын үөрэтэн, өрүттэр санааларын истэн баран, СӨ Үрдүкү Суутун административнай дьыалаларга сууттуур кэллиэгийэтэ бастакы инстанция суутун быһаарыытын уларытыыта суох хаалларда.