Ньурба куораттан чугас хагдаҥ эһэ Бүлүү өрүһү туораабыт

Атырдьах ыйын 2 күнэ үүнэр түүнүгэр балыксыттар Ньурба куорат сөтүөлүүр сириттэн үс килэмиэтирдээх сиргэ Бүлүү өрүһү туораан иһэр эһэ оҕотун видеоҕа уһулбуттар. Бу туһунан ЯСИА суруйар.

“Бу эргини көрүү-истии кэмигэр Ньурба куораттан үс килэмиэтирдээх сиргэ хагдаҥ эһэ суолун көрдүбүт. Баппаҕайын кэтитэ 10 см тэҥнэһэр. Ол аата эһэ икки-үс саастаах. Ол эрээри, эһэ ийэтин суола көстүбэт. Видеоҕа эһэ куорат уҥуор Бүлүү өрүһү туораабыта көстөр, бэйэтэ олохсуйар сиригэр барбыт” – диэн Ньурба улууһунааҕы айылҕа ураты харыстанар сирдэрин судаарыстыбаннай иниспиэктэрэ Айаал Иванов ЯСИАҕа иһитиннэрбит.