Ньурба оройуонугар сибиир язвата үөскүү сылдьыбыт пууннарыгар бетон куттулар

1955 сыллаахха Ньурба улууһун Акана нэһилиэгин Амыдай диэн сиригэр сүөһүгэ сибиир язвата үөскээн элбэх сүөһү охтубута. Ыалдьыбыт сүөһү өлүгүн умаппыттара.

СӨ Бэтэринээрийэ департамена иһитиннэрбитинэн, бу күннэргэ Ньурба улууһугар урут сибиир язвата үөскүү сылдьыбыт аҕыс пуунугар үлэлэри ыыппыттар. Ол курдук урут өлбүт сүөһүлэр уматыллыбыт сирдэрэ нэһилиэктэн 48 км тэйиччи баар. Аҕыс киһилээх биригээдэ хомуллан, олор истэригэр бэтэринээринэй исписэлиистэр, ону сэргэ сир үлэһитэ, нэһилиэк баһылыга буолан икки күн устата бу сиргэ бетон кутан, кутталлаах сири күрүөлээн, бэлиэ сурук ыйаабыттар. Бу үлэҕэ уопсайа  үс тиэхиньикэ үлэлээбит. Акана нэһилиэгин баһылыга Ефрем Семенов эпизоотическай куттал баарын эрдэттэн сэрэтэн сөптөөх быһаарыныыны ылбыт.