Ньурба суруналыыстара улуус баһылыгын кытта сырдатыы үлэтин сүбэлэстилэр

Бүгүн Ньурба улууһун иһитиннэрэр-биллэрэр тиһиктэрин үлэһиттэрэ улуус салалтатын кытта көрсөн, олоҕу-дьаһаҕы сырдатыы үлэтин сүбэлэстилэр.

Бу туһунан улуус баһылыга Алексей Иннокентьев бэйэтин ТГ-ханаалыгар иһитиннэрдэ.

“Баһылыгы бырайыактыыр үлэҕэ уонна уопсастыбаннаһы кытта сибээскэ солбуйааччыта Валерия Владимированы кытта «СМИ» үлэһиттэрин көрсөн сүбэлэстибит. Улуус муниципальнай тэриллиилэрэ уонна тэрилтэлэр бары 100% госпабликтарга киирэн олороллор. Улууска сонуннары киэҥник тарҕатыыга, олохтоох салайыныы уорганнарын үлэтин-хамнаһын сырдатыыга хамсааһын тахсыбытын бэлиэтиибин. Кэккэ нэһилиэктэр үлэлэрин-олохторун көхтөөхтүк сырдата олороллор. Ол эрээри, бу хайысхаҕа инники үлэбит өссө даҕаны элбэх. Үлэни-хамнаһы сырдатыы эрэ буолбакка,  госпабликтарга нэһилиэнньэни кытта хардарыта сибээс күүһүрүөх тустаах. Саҥа хайысханы, саҥа хамсааһыны киллэрэргэ сүбэлэстибит. Былаан ылынан, ол быһыытынан үлэлиэхпит”, — диир Алексей Иннокентьев.