Ньурба, Таатта улуустарыгар уот арахсыбытын туһунан иһитиннэрии киирдэ

Ньурба, Таатта улуустар сорох нэһилиэктэригэр уот барбытын туһунан иһитиннэрии киирэтин кытта тута туһааннаах тэрилтэлэргэ төлөпүөннээн тугун-ханныгын ыйытыластыбыт.

“Сарсыарда 6 чаас 54 мүнүүтэҕэ технологическай кэһиллиинэн уот ситимин үлэһиттэр араарбыттара. Уолба, Уус Таатта уонна Хара Алдан уотун 8 чаас 10 мүн. холбообуттара. Энэргиэтиктэр икки анал тиэхиньикэлээх 6 киһилээх икки биригээдэлэрэ “Уолба – Мэҥэ Алдан” лииньийэтин көрө сылдьаллар”, — диэн Якутскэнерго ПАУо киин электрическэй ситимнэрин пресс-сулууспата иһитиннэрэр.

“Тохсунньу 15 күнүгэр түүн 02 чаас 37 мүнүүтэҕэ 10 киловольт күүрүүлээх Л-Чкалов лииньийэ арахсыбыта. Акана, Хаҥалас, Үөдэй сэлиэнньэлэргэ, Чкалов учаастакка уот барбыта. Тутатына 54 км усталаах лииньийэни кэрийэн көрө Ньурбатааҕы РЭС биригээдэтэ тахсыбыта. Билигин онно 6 киһи чөлүгэр түһэрии үлэтигэр сылдьар. Сотору кэминэн уот ситимэ холбонуоҕа”, — диэн “Якутскэнерго” Арҕааҥҥы электрическэй ситимнэрин пресс-сулууспата биллэрдэ.

Хаартыска: СИА.