Ньурба техникумугар баһаартан сэрэхтээх буолууга  үөрэттилэр

Ньурба техникумугар устудьуоннары уонна үлэһиттэри ыксаллаах түгэннэргэ бэлэмниир, баһаартан сэрэтэр тэрээһиннэр ыытылыннылар диэн СӨ Судаарыстыбаннай баһаарынай сулууспата иһитиннэрэр.

Сүрүн сорук: баһаар тахсар түгэнигэр чопчу хайдах дьаһаныахтааҕы быһаарыы уонна ыар содуллары сэрэтии.

МПЧ-3 үлэһиттэрэ үөрэнээччилэргэ баһаартан харыстаныы туһунан сиһилии инструктаһы биэрдилэр. Баһаарынайдар уот турбут түгэнигэр хайдах дьаһаныахтааҕы, бастакы кэмҥэ умуруорар тэриллэри хайдах туһаныахтааҕы уонна суһал сулууспаларга хайдах биллэриэхтээҕи көрдөрөн быһаардылар.

Баһаартан сэрэтэр инструктор Аэлита Иванова «Дьиэҕэ баһаартан харыстаныы» диэн тиэмэҕэ лиэксийэ аахта. Кэпсэтии кэмигэр устудьуоннарга судургу, ол эрэн олоххо олус суолталаах ирдэбиллэри: электроприбордары көрбөккө хаалларар сатамматын, чааһынай дьиэлэргэ электрооборудование уонна оһох алдьамматах туруктаах буолуохтааҕын санаттылар.