Хаартыска: ааптар тиксэриитэ
Биһиги Харбалаахпытыгар дьоро күн тосхойдо. Ньурбатааҕы көһө сылдьар судаарыстыбаннай тыйаатыр бөлөҕө кэлэн, 2 испэктээҕи көрдөрөн, кэрэ эйгэтигэр сыһыарда.
Киэһэ биэс чаастан оҕолорго Сергей Козлов «Тили-мили Трамдия» диэн айымньытынан оонньоотулар. Кырачааннар бэркэ дьоһуннанан олорон көрдүлэр, үөрдүлэр-көттүлэр. Онтон киэһэ 7 чаастан Алексей Балакаев суруйуутунан «Ийэ сүрэҕэ» испэктээҕи көрдөрөн, көрөөччү кутун туттулар. Туруорааччы-режиссер — СӨ ускуустубатын үтүөлээх диэйэтэлэ Юрий Макаров, худуоһунньук Дарья Тартакынова.
Сүрүн оруоллартан биирдэстэригэр «Уот Дьулустааҥҥа» эбээ Сүөкүлэни оонньообут Майя Петровна Слепцованы Ойууна оруолугар астына көрдүбүт. Киһи үөрэрэ, Пүрбээ диэн сүрүн оруолга таатталар бэйэбит оҕобут Никита Григорьев олус чаҕылхайдык оонньоон, кэнэҕэһин кэскиллээх артыыс буолар чинчилээҕин итэҕэтэн үөртэ.
Бу бөлөҕү Ньурба Хатыытыттан төрүттээх Леонид Александрович Анисимов салайан илдьэ сылдьар. Кини көрөөччүлэргэ туһаайан: «Биир дойдулаахпыт Иван Васильевич Николаев төрүттээбит бөһүөлэгэр кэлэн, бар дьонугар үөрүүнү бэлэхтээбиппит биһиэхэ олус долгутуулаах! Үгүс көрөөччү кэлбититтэн үөрдүбүт!» — диэтэ.
Бу испэктээккэ уот-күөс, тыас-уус, дьүрүл сүрүн оруолу ылан, көрөөччү биир тыынынан ылынар эйгэтин үөскэттэ. Уоту-күөһү Константин Михайлов, дьүрүлү Станислав Фокин кыайа-хото туттулар.
Кэрэ эйгэтигэр сыһыаран, дьоро киэһэни бэлэхтээбит артыыстарбытыгар айымньылаах үлэҕитигэр үрдүк ситиһиини, махталлаах көрөөччүлэри, тус олоххутугар дьолу-соргуну баҕарабыт! Суолгут көнө, айаҥҥыт сымнаҕас буолуохтун!
Валентина КРИВОШАПКИНА, Харбалаах
Синоптиктар билгэлииллэринэн, бүгүн, олунньу 15 күнүгэр, Саха сиригэр кыралаан хаар түһэрэ күүтүллэр, өрөспүүбүлүкэ арҕаа өттүгэр…
Бу күннэргэ Саха сирин улуустарыгар Төрөөбүт тыл уонна сурук-бичик күнүгэр анаммыт тэрээһиннэр салҕаналлар. Биир олус…
Бу үөрүүлээх күҥҥэ СӨ Бырабыыталыстыбатын Бэрэссэдээтэлэ Кирилл Бычков кыттыыны ылла. Гимназия устуоруйата 1990-с сыллар саҥаларыттан,…
Бэҕэһээ, Ийэ тыл, сурук-бичик күнүгэр, Киллэм култууратын дьиэтин үлэһиттэрэ ураты эҕэрдэлэринэн дьону соһуттулар уонна үөртүлэр.…
Бүгүн Уһук Илин тоҕус эрэгийиэнин сүүмэрдэммит хамаандаларын художественнай гимнастикаҕа бастыыр иһин күрэхтэһиилэрин үһүс күнэ Саха…
Төрөөбүт тыл уонна сурук-бичик күнүнэн Таатта улууһун Дьохсоҕон нэһилиэгэр “Саргыланнын-кынаттаннын сахам тылын кэрэтэ-кэрэмэһэ!” диэн өрөспүүбүлүкэ…