Ньурба улууһа байыаннай эпэрээссийэҕэ кыттар биир дойдулаахтарыгар көмөлөһөр

Ньурба улууһа байыаннай дьайыыга кытта сылдьар биир дойдулаахтарыгар уонна кинилэр дьиэ кэргэттэригэр көмө үлэтин ыытар. Ол туһунан Дьокуускай куоракка Ньурба улууһун бэрэстэбиитэлэ Прокопий Чымыров кэпсээтэ. 

— Саха сириттэн, Ньурба улууһуттан биһиги дойдубут судаарыстыба тыын интэриэһин туһугар Украинаҕа ыытар байыаннай эпэрээссийэтигэр РФ Сэбилэниилээх күүстэрин кэккэтигэр баҕа өттүнэн хантараах түһэрсэн, чиэстээхтик сулууспалыы сылдьар дьонноохпут. Бу күннэргэ улууска хантарааҕынан байыаннай сулууспаҕа барыан баҕалаахтары кытта үлэ бара турар. Кинилэргэ уонна дьиэ кэргэттэригэр судаарыстыба, нэһилиэнньэ, уопсастыбаннас өттүлэриттэн болҕомто, кыһамньы, өйөбүл миэрэлэрэ элбэх, өссө да тупсарылла тураллар.

Улууспут баһылыга Алексей Иннокентьев былырыын быстах хомуур саҕаланыаҕыттан тутатына дьоммутугар тугунан, хайдах көмөлөһөргө сыал-сорук туруорбута, тута анал штабы тэрийэргэ дьаһал таһаарбыта. Байыаннай эпэрээссийэҕэ барар уолаттарбытыгар таҥас-сап, бастакы суолталаах наадаларын ылыналларыгар хас биирдиилэригэр биир кэмнээх харчынан көмө олохтоммута. Быстах хомуурга хабыллыбыт дьоммут дьиэ кэргэттэригэр өйөбүл олохтоммута. Улуус дьаһалтатыттан кинилэргэ куратордар анаммыттара.

Нэһилиэктэр баһылыктара эмиэ дьиэ кэргэттэри кытта ыкса ситимнээхтик үлэлииллэр. Улууска волонтерскай куорпус үлэтин ыччат бэлиитикэтин управлениета сүрүннүүр. Ону сэргэ култуура тэрилтэлэрэ, үлэһиттэрэ араас аһымал кэнсиэртэри, аахсыйалары, тэрээһиннэри ыытаннар, үбүнэн өйөбүллэрин киллэрэ сылдьалларын таһынан, улуус олохтоохторо, урбаанньыттар, тэриллиилээх хаһаайыстыбалар көхтөөхтүк көмөлөһөллөр. Онон байыаннай эпэрээссийэҕэ кытта сылдьар дьоммутугар уонна кинилэр дьиэ кэргэттэригэр улуустааҕы көмө пуондатыгар үп киирэ турар. Онон бу өттүгэр хамсааһын үчүгэй. Саҥа Дьыл иннинэ улуус бүттүүнүттэн хомуллан Байыаннайдарга көмө пуондатыгар киирбит үбүнэн массыына, квадрокоптердар, тепловизордар ылыллан, улуус баһылыга Алексей Иннокентьев байыаннай эпэрээссийэ зонатыгар илдьэн туттарбыта.

Бу саас олунньу ыйтан саҕалаан Ньурба улууһуттан байыаннай эпэрээссийэҕэ кытта барбыт уолаттарбыт уоппускаҕа кэлитэлээн саҕалаабыттара. Ааспыт ыйга ботуччу кэлитэлээтилэр, онон күн көтө-көтө үстүү-иккилии уол кэлэр. Уоппускаларын хонуга 14 хонукка диэри, оттон госпиталь кэнниттэн бааһырыылаах, эчэйиилээх буойуттар уоппускалара ый кэриҥэ буолар, ол төһө буолара чаастарыттан, доруобуйаларын туругуттан тутулуктаах.

Отуттан тахса уолбутун улуус баһылыгын Алексей Иннокентьев уонна улуус аатыттан Дьокуускай куорат аэропордугар көрүстүм. Кинилэр уоппускаларыгар көтөн кэллэхтэринэ, өрөспүүбүлүкэ бырабыыталыстыбатын, Ил Түмэнин, уопсастыбаннай тэрилтэлэр бэрэстэбиитэллэрэ, көрсөллөр, Ил Дархан аатыттан, үгэс курдук, саха быһаҕа туттарыллар. Уоппускалара уон биэстии игин эрэ күн буолар. Онно баттаһан сорохтор балыыһаҕа киирэн көрдөрүнэ охсоллоругар, доруобуйаларын көннөрүнэллэригэр Доруобуйа харыстабылын министиэристибэтин нөҥүө бырабыыталыстыба улахан көмөнү оҥорон, буойуттар туһааннаах көмөнү ылаллара ситиһиллэр.

Байыаннай эпэрээссийэҕэ хантарааҕынан барар үс уолбутун атаардыбыт. Айыл Дьулурха салайааччылаах «Якутия с тобой!” байыаннайдарга көмөнү тутар пуун штабын волонтердара буойуттарбытыгар көмөлөрүн туттаран атаарыстылар.

Биһиги тыылга олорор дьон, Ньурба улууһугар, Дьокуускайга олорор биир дойдулаахтарбыт, бука бары бу уолаттарбыт кыайыы аргыстаах, чөл туруктаах, этэҥҥэ эргиллэн кэлэллэригэр баҕарабыт!