Ньурба улууһугар эр киһи ууга былдьанна

Атырдьах ыйын 11 күнүгэр 00:20 ч. Ньурба улууһун ЕДДС суһал диспетчерскэй сулууспатын дьуһуурунайыттан Антоновка сэлиэнньэтиттэн 6 км аллараа Бүлүү өрүс уҥа кытылыгар балыктыы сылдьан киһи ууга былдьаммытын туһунан иһитиннэрии киирбит.

Көрдөөһүҥҥэ Ньурба көрдүүр-быыһыыр этэрээтин 8 быыһааччыта тахсыбыт.

Быыһааччылар миэстэтигэр тиийэн быһылаан тахсыбытын көрбүт дьонтон туох буолбутун ыйыталаспыттар уонна анал оборудованиены туттан көрдөөһүнү саҕалаабыттар. Оборудование  көмөтүнэн ууга түспүт киһи  быһа холоон ханна сытара быһаарыллыбыт. 05.20 муҥха көмөтүнэн ууга түспүт киһи өлүгүн биэрэккэ таһааран, полиция үлэһиттэригэр туттарбыттар.

Көрдөөһүҥҥэ Ньурба быыһыыр-көрдүүр этэрээтин быыһааччылара, 2 полиция үлэһитэ, 3 доброволец уонна сүппүт киһи 3 аймаҕа кытыннылар диэн СӨ Быыһыыр сулууспата иһитиннэрэр.