Ньурба улууһугар сүппүт дьахтары иккис нэдиэлэтин көрдүүллэр

Саха сиринээҕи Быыһыыр сулууспатын Ньурбатааҕы көрдүүр-быыһыыр этэрээтин быыһааччылара, ИДьМ үлэһиттэрэ уонна олохтоохтор сүппүт дьахтары көрдөөһүнү салгыыллар.

Үлэ томороон тымныыларга тохтообот — тохсунньу 14 күнүгэр Ньурба улууһугар -52 кыраадыс тымныы бэлиэтэммит.

Чуукаар сэлиэнньэтигэр тохсунньу 3 күнүгэр 70 саастаах дьахтар дьиэтиттэн тахсан, биллибэт хайысханан барбыт. Уолун сайабылыанньатынан көрдөөһүн үлэтэ тохсунньу 5 күнүттэн саҕаламмыт.

Сүппүт дьахтар деменциянан ыалдьара биллэр. «Быыһааччылар уонна волонтердар көрдөөһүн бары кыаллар ньымаларын туһаналлар, ИДьМ ыттаах этэрээтэ үлэлиир. Көрдөөһүн билиҥҥитэ түмүгэ суох. Ньурба улууһугар күүстээх тымныылар тураллар, бүгүн манна -52 кыраадыс. Ол да буоллар, көрдүүр үлэ ханнык да күн-дьыл туругар тохтообот», — диэн иһитиннэрдэ Ньурбатааҕы көрдүүр-быыһыыр этэрээтин салайааччыта Афанасий Ноев.