Ньурба улууһугар сүппүт эр киһи өлүгүн күөлтэн буллулар

Ньурба улууһугар быыһааччылар үс хонук анараа өттүгэр сүппүт эр киһи өлүгүн буллулар. Бу туһунан чэппиэргэ Саха сиринээҕи Быыһыыр сулууспатын пресс-сулууспата иһитиннэрдэ.

44 саастаах эр киһи от ыйын 21 күнүгэр Чкалов сэлиэнньэтигэр сүппүт. Кини Бэрэ күөлгэ балыктыы барбыт уонна төннүбэтэх. Быһылаан тахсыбыт сиригэр балыктыыр илимнэрдээх кураанах тыы көстүбүт. Ол күн кинини аймахтара уонна олохтоохтор көрдөөн саҕалаабыттара. Сарсыныгар көрдөөһүҥҥэ Ньурбатааҕы көрдүүр-быыһыыр этэрээт икки быыһааччыта кыттыспыт. От ыйын 24 күнүгэр сарсыарда кинилэр киһи өлүгүн күөлтэн булан, полиция үлэһиттэригэр туттардылар.