Ньурба улууһугар үс күннээх траур биллэрилиннэ

Ньурба улууһугар биэс киһи баһаарга былдьаммытынан үс күннээх траур биллэрилиннэ. Бу туһунан улуус баһылыга Алексей Иннокентьев иһитиннэрэр.

Баһаар Ньурба улууһун Ньурбачаан нэһилиэгэр тохсунньу 28 күнэ үүнэр түүнүгэр буолбута. Быһылаан тахсыбыт сириттэн 2011, 2014 уонна 2023 сыллаах үс оҕо, ону таһынан 1971 уонна 1977 сыллаах икки улахан киһи өлүктэрэ булуллубуттара. 1999 с.т. дьахтар уонна 2021 с.т. кыыс оҕо эмсэҕэлээбиттэрэ.

Ньурба улууһун баһылыга кутурҕанын биллэрэр.

Билигин холуобунай дьыала тэриллэн, Ньурба оройуонун силиэстийэлиир отделын силиэдэбэтэллэрэ быһылаан тахсыбыт сиригэр үлэлииллэр. Силиэстийэ хаамыытын Арассыыйа Силиэстийэлиир кэмитиэтин Саха сиринээҕи силиэстийэлиир управлениетын салайааччыта хонтуруолга ылла.