Ньурба улууһун булчуттара байыастарга көмө оҥордулар

Ийэ дойдуларын көмүскүүр, ытык иэстэрин толоро сылдьар уолаттарбытыгар өйөбүл күн-түүн күүһүрэн, тэнийэн иһэр. Бу үтүө дьыалаҕа Ньурба улууһун булчуттара кыттыһан, биир дойдулаахтарыгар көмө оҥордулар.

Ол курдук, Ньурба улууһун булчуттара байыаннай дьайыыга кытта сылдьар биир дойдулаахтарыгар анаан 24 000 солк. уу-харчынан кыттыстылар. Булчуттар хомуйбут харчыларын Ньурба улууһун судаарыстыбаннай экология кэтэбилин кэмитиэтин салайааччы Алексей Афанасьев улуус дьаһалтатыгар аҕалан туттарда.

Көмө аҥардас үбүнэн муҥурдаммат. Бу — Ньурба булчуттарын дьиҥнээх патриоттуу санаалара, биир дойдулаахтарыгар күүстээх эрэллэрэ уонна махталлара. Хомуллубут үбү-харчыны атын тэрилтэлэр уонна биирдиилээн дьон киллэрбит көмөлөрүн кытта холбоон,  араас наадалаах оборудованиелары атыылаһыахтара. Улуус дэлэгээссийэтэ сотору байыаннай дьайыы зонатыгар айаннаан,  атыылаһыллыбыт малы-салы, дойдуларын гуманитарнай көмөтүн, дьонтон, тэрилтэлэртэн хомуллубут баһыылкалары байыастарга тиэрдиэхтэрэ.

«Ньурба улууһун булчуттарыгар, кэмитиэт салайааччытыгар Алексей Афанасьевка, ону таһынан бу үтүө дьыалаҕа кыттыспыт хас биирдии киһиэхэ махталбытын тиэрдэбит! Эһиги көмөҕүт байыастарбыт олохторун чэпчэтэргэ, кыайыыбытын чугаһатарга туһалаах!», — диэн Ньурба улууһун дьаһалтатын пресс-сулууспата иһитиннэрэр.