Ньурба улууһун дьаһалтата байыастар дьиэ кэргэттэригэр окко көмөлөһөр

Билигин бары хаһаайыстыбаларга былдьаһыктаах от күннэрэ тураллар. Ньурба улууһун дьаһалтатын үлэһиттэрэ байыаннай сулууспалаахтар дьиэ кэргэттэригэр окко көмөлөһөллөр.

Атырдьах ыйын 1 күнүгэр Дьиикимдэ нэһилиэгиттэн байыаннай сулууспалаах Альберт В. дьиэ кэргэнигэр 9 киһи тахсан окко субуотунньуктаатылар. Отчуттар биригээдэлэрин улуус баһылыгын солбуйааччыта Наталья Петрова салайда. Оройуон дьаһалтатыттан уонна 4 нэһилиэктэн эдэр ыччат, успорт управлениетыттан, тыа хаһаайыстыбатын департаменыттан исписэлиистэр түмсэн, мунньуу күүстээх үлэтин үмүрүттүлэр.

Кэтэх хаһаайыстыбаларыгар барыта 20 төбө ынах сүөһүнү тутан олорор дьиэ кэргэн сааһыран, үлэни кыайбат буолан иһэллэрин, отторун мунньуутугар ыарырҕата сылдьыбыттарын кэпсээтилэр. Туораттан көмөлөһөр дьоно суохтарын, оскуолаҕа үөрэнэр 2 сиэннэрэ күүс-көмө буолалларын үллэстэн туран, субуотунньукка кыттыбыт дьоҥҥо улахан махталларын тиэртилэр.

Лина Семенова