Ньурба улууһун Маар сэлиэнньэтигэр 35 миэстэлээх уһуйаан аһылынна
![](https://sakha-sire.ru/wp-content/uploads/2023/12/maar-1.jpeg)
Педагог уонна уһуйааччы сылын иитинэн ахсынньы 16 күнүгэр Ньурба улууһун Маар сэлиэнньэтигэр күүтүүлээх-кэтэһиилээх 35 миэстэлээх уһуйаан аһыллыытын үөрүүлээх тэрээһинэ буолла. Эбийиэк “Сахам сирэ XXI үйэҕэ” үтүө дьыала хамсааһын бырагырааматынан тутулунна.
![](https://sakha-sire.ru/wp-content/uploads/2023/12/maar-2.jpeg)
Оҕолору, педагогтары, төрөппүттэри Үөрэх уонна билим миниистирэ Нюргуна Соколова, СӨ Билим академиятын төрөөбүт тыллары үөрэтэр, чөл хаалларар уонна сайыннарар киин салайааччыта Феодосия Габышева, “Сахам сирэ XXI үйэҕэ” үтүө дьыала өрөспүүбүлүкэтээҕи хамсааһын салайааччыта Алексей Петров, Ньурба улууһун баһылыга Алексей Иннокентьев эҕэрдэлээтилэр.
Ыалдьыттарга анаан уһуйаан иитиллээччилэрин, үлэһиттэрин быыстапкатын туруордулар. Иитиллээччилэр махталларын бэлиэтигэр “Күнчээн” ырыаны бэлэхтээтилэр.
Саҥа эбии тутуу оҕо иллэҥ кэмин туһалаахтык атаарарыгар уонна иитиигэ аныгы усулуобуйаҕа эппиэттиир. Манна бөлөҕүнэн сылдьарга уонна утуйарга аналлаах бииргэ холбоммут киэҥ-куоҥ хостор, универсальнай саала, эбии үөрэхтээһин, уйулҕа үлэһитин хосторо бааллар. Маны таһынан уһуйаан ас астыыр уонна мэдиссиинэ блоктардаах.
“Күнчээн” уһуйаан педагогическай үлэҕэ бэтэрээнэ Мария Ильинична Николаева үөрүүтүн үллэстэр: “Хас да сыл кэтэспит уһуйааммыт аһыллыытын сэлиэнньэ олохтоохторо, кэлэктиип долгуйа көрүстэ. Билигин саҥа дьиэҕэ иитиллээччилэрбитин кэтэһэбит”.
“Бүгүҥҥү тэрээһин сэлиэнньэҕэ эрэ буолбакка, бүтүн өрөспүүбүлүкэҕэ улахан суолталаах. Бу курдук аныгы тутуулаах уһуйаантан чиҥ доруобайалаах, эргиччи сайдыылаах көлүөнэлэр иитиллэн тахсалларыгар эрэнэбин”, — диэн Үөрэх уонна билим миниистирэ Нюргуна Соколова бэлиэтээтэ.
Уһуйаан сэбиэдиссэйэ маннык усулуобуйаҕа оскуола иннинээҕи үөрэхтээһин өссө таһаарыылаахтык үлэлииригэр уонна уһуйаантан иитиллэн тахсар оҕолор оскуолаҕа олоччу бэлэм буолалларыгар эрэллээҕин эттэ.
Саҥа, эбии уһуйааҥҥа оҕолору 1,5 саастарыттан хабан, икки бөлөх үлэлиэҕэ. Бу туһунан Үөрэх уонна билим министиэристибэтин саайтыгар суруйаллар.
Сообщить об опечатке
Текст, который будет отправлен нашим редакторам: