Ньурба улууһун тутааччылара соруктарын толорон дойдулаатылар

Бу күннэргэ Өймөкөөҥҥө араас улуустартан кэлбит тутуу биригээдэлэрэ сорохторо үлэлэрин түмүктээн баран, атыттар саҥа кэлэн эрэллэр. 

Ньурба улууһуттан кэлэн үлэлээн барбыт тутуу биригээдэтин  туһунан улуус хаһыаттарын уопсастыбаннай кэрэспэдьиэнэ Тамара Винокурова маннык сырдатта:

— Өймөкөөн улууһун уустук кэмигэр халаантан эмсэҕэлээбит олорор дьиэлэри чөлүгэр түһэриигэ уонна да атын үлэҕэ Саха сирин араас муннуктарыттан суһаллык көмөҕө кэлбиттэрэ барыбытын кынаттыыр. Ол курдук, улуустартан биригээдэлэр күн аайы утуу-субуу кэлэ тураллар. Бастаан Олоҥхо дойдута Сунтаартан кэлбит дьону көрсүбүппүт.  Кинилэри кытта тилэх баттаһа күөх Ньурба хоһууттара бу күннэргэ тигинэччи үлэлээн баран, соруктарын толорон, дойдуларыгар төннөр ыраах айанарыгар туруннулар. Кэлиэхтэриттэн ыла мин биир дойдулаахтарбын кытта бииргэ алтыһа, үлэлэрин хаамыытын билсэ сырыттым.
   Владимир Васильев  салайааччылаах ньурбалар кыраайы үөрэтээччи элбэх кинигэ ааптара, улуус бочуоттаах олохтооҕо, Нуучча географическай уопсастыбатын чилиэнэ, 80-тан тахса араас омук дойдутун туристара  «Бабушка мира»  диэн убаастаан ааттаабыт киһилэригэр Тамара Васильеваҕа көмөлөстүлэр.  Ол курдук, мал-сал уурар анал сарайы тутттулар, хос аайы муостаны көтүрэн, буор тастылар,  эргэ, туһаттан тахсыбыт малы-салы дьаһайдылар,  тиэргэн иһин ыраастаатылар.

 Үлэһит уолаттарын атаарар күнүгэр Тамара Егоровна  биригээдэҕэ ис сүрэҕиттэн долгуйан , санаата көтөҕүллэн туран махтанна. Барыларыгар тымныы оройун Өймөкөөнү өйдүү-саныы сылдьалларын туһугар өйдөбүнньүк бэлэхтэри туттаран  үөртэ.

Ньурба уолаттара өрөспүүбүлүкэҕэ биллэр уопсастыбанньык Семен Сивцев-Өймөкөөн Сэмэнэ-Чысхаан балаҕаныгар ыалдьыттаан бэрт элбэҕи көрдүлэр-биллилэр, иһиттилэр. Өймөкөөн чахчы даҕаны олус дириҥ, баай устуоруйалаах улуус буоларын итэҕэйдилэр.

Уолаттар бэйэлэрин өттүлэриттэн Тамара Егоровнаҕа истиҥ  ийэлии сылаас сыһыанын, минньигэс , тотоойу аһын иһин барҕа махталларын тириэртилэр. Кинилэр бука бары Өймөкөөнҥө бастакы сырыылара эбит . «Хаһан эмэ налыччы, үчүгэй, табыгастаах , холку кэмҥэ күүлэйдии , Өймөкөөн ураты кэрэ сирдэрин көрө кэлбит киһи», — диэн баҕа санааларын эттилэр. Бу нэһилиэккэ 40-ча сыл олорбут, Өймөкөөнү иккис дойду оҥостубут киһини, миигин,  «дьэ, кырдьык даҕаны сөбүлээн, олохсуйуоххун олохсуйбут эбиккин» диэн үөртүлэр.

«Дойдум дьоно дууһабар аанньал курдук ыалдьыттар…» — диэн ырыаҕа мээнэҕэ ылламмат.  Биир дойдулаахтарым, ахтылҕаннаах күөх Ньурбам ньургун уолаттара Өймөкөөн улууһа саамай кыһалҕаҕа ылларбыт уустук кэмигэр күүс-көмө, өйөбүл буолбуттара хайҕаллаах суол. Амыдайым Тамара Егоровналыын кинилэргэ этэҥҥэ буолууну, айаннарыгар күөх уоту,  тус олохторугар дьолу-соргуну баҕара хааллыбыт. Халаантан эмсэҕэлээбит Өймөкөөн нэһилиэгин дьоно күөх Ньурба үлэһит уолаттарын өрүү махтана ахтыахтара.