Ньурба улууһун Убайааныгар питбуль боруода ыт хаһаайына суох бэйдиэ барбыт

Бүгүн, муус устар 24 күнүгэр социальнай ситимҥэ Ньурба улууһун Убайааныгар питбуль боруода, моонньугар моойторуктаах ыт бэйдиэ сылдьар ыты тыыннаахтыы тутар, хадьырыйар видеота киэҥник тарҕанна. Үгүстэр видеону устааччыны сүөргүлээбиттэр, ыты сатаан тохтоппото диэн айдаарбыттар. Ол кэнниттэн аны сотору кэминэн питбуль ыты массыына түҥнэри көтөн өлөрбүт диэн суруйбуттар.

Биһиги тута Ньурба куоратын Убайаан түөлбэтигэр сибээскэ таҕыстыбыт. Миигин кытта олохтоох бэтэринээринэй сулууспа үлэһитэ Николай кэпсэттэ. Араспаанньатын этэртэн туттунна:

— Социальнай ситимҥэ тарҕаммыт хаһаайыннаах питбуль ыт бэҕэһээ массыынаҕа киирэн биэрэн өлбүт сураҕын иһиттибит. Хаһаайына иһитиннэрбитинэн, ыт сыабын быһа баран ити уулуссаҕа тахсан ыты туппут эбит. Бэтэринээринэй иниспиэктэрбит оҕотун көрөн уоппускаҕа олорор, онон ханнык да миэрэ ылыллыбата. Ыты ким түҥнэри көтөн өлөрбүтэ эмиэ биллибэт. Хаһаайына ытын өлүгүн суолтан булбут этэ.

Ол эрээри бэлиэтээн этэр буоллахха, питбуль боруода ыт иитиилээх саа кэриэтэ кутталлаах, охсуһуук боруодаларга киирсэр. Маннык боруода ыты томторуга, быата-туһаҕа суох бэйдиэ ыытар дьоҥҥо-сэргэҕэ кутталлаах.