Ньурба Үөдэйигэр Уот эстафетатын көрүстүлэр

Бэҕэһээ, кулун тутар 25 күнүгэр, Ньурба улууһун кыраныыссатыгар  Үөдэй сиригэр «Азия оҕолоро» оонньуулар  уоттарын үөрүүлээх быһыыга-майгыга нэһилиэк олохтоохторо оҕолорун кытта тахсан  көрүстүлэр.

Бу үөрүүлээх түгэни Үөдэй нэһилиэгин баһылыга Мария Николаева сырдатта:

—    Бу сылга саамай бэлиэ уонна чаҕылхай түгэнинэн «Азия оҕолоро» VIII Норуоттар икки ардыларынааҕы спортивнай оонньуулар буолуохтара. Суолталаах бэлиэ тэрээһин  Уотун уматыы сиэрэ-туома Өлүөнэ очуостарын тэллэҕэр  оҥоһуллубута. Суолталаах Уот  факелы  күөрэччи көтөҕөн эстафета «Азия оҕолоро» оонньуулары төрүттээччи, СӨ  Бастакы Бэрэсидьиэнэ Михаил Николаев төрөөбүт Хаҥалас улууһуттан  Саха сирин устун алгыстаах айанын саҕалаабыта. Онон ытык-мааны Ньурбабыт чэлгийэ сайдар Үөдэй сиригэр тиийэн кэлбит дьоһун түгэнин туоһулара буолар дьоро күммүтүн атаардыбыт.   Үөдэй кырачаан оҕолоро «Азия оҕолоро» оонньуу былааҕын тутан, ыччаттарбыт киэргэнэн кэлэн, тэрээһиммитин сэргэхситтилэр.

2024 сыл Саха сиригэр Оҕо саас сылынан биллэриллибитэ. Самаан сайыммыт силигилээн турар кэмигэр Оҕо саас, Успуорт уонна Эйэ өйдөбүллэрэ дорҕоонноохтук этиллэн,  Саха сирин, Арассыыйа уонна аан дойду олоҕор ураты сүүрээни киллэриэхтэрэ.  Ньурба ньургун дьонноох сирин талба талыы кырдалыгар үктэммит ытык-мааны ыалдьыттарбытын өбүгэлэрбит үтүө үгэстэринэн Үөдэй, Хаҥалас Далбар хотуттара саамал кымыһынан, арыылаах алаадьынан айах тутан  күндүлээтилэр.

Киэҥ Ньурба дьоллоох туонатыгар “Азия оҕолоро” оонньууларын аалай уотун Үөһээ Бүлүү  улууһун социальнай боппуруоска баһылыгы солбуйааччы Анна Уларова  туттарда. Эрчимнээх, успуорду, чөл олоҕу өрө тутар, талааннаах оҕолорбутун быстыбат уһун тыынныыр, үйэлэргэ үрдук күүстүүр, кэхтибэт кэскилин кэҥэтэр уйгулаах Уоппутугар уруй-туску! Дьоро күн Ньурба оройуонун  баһылыгын   социальнай боппуруостарга солбуйааччы Наталья Петрова,  Ньурба  Улууһун  Сэбиэтин  бэрэссэдээтэлэ  Нюргуяна Михайлова үөрүүбүтүн үллэстэн, эҕэрдэ сайаҕас тыллары анаатылар. Успуорт, Эйэ уонна Доҕордоһуу аатыгар дьону түмэр “Азия оҕолоро”  VIII оонньууларын Уотун эстафетата  өрөспүүбүлүкэбит бары  улуустарын кэрийэн, бэс ыйын 26 күнүгэр Дьокуускайга кэлэн, “Азия оҕолоро” оонньууну арыйыаҕа.  «VIII норуоттар икки ардыларынааҕы успуорт оонньууларыгар —  Уруй-Айхал!» тылларынан  салгыы Уот эстафетата Ньурбаҕа айаннаата.