Ньурба Үөдэйин кырачааннарыгар нэһилиэк баһылыга ыалдьыттаата

Улуу Кыайыы үөрүүлээх күнүн көрсө улуустарга араас тэрээһиннэр буола тураллар.

Кэрэхсэбиллээҕэ баар, нэһилиэк баһылыктара бэйэлэрэ көҕүлээн араас тэрээһиннэри ыыталлар.

Биир оннук тэрээһин туһунан Ньурба улууһун Үөдэй нэһилиэгин баһылыга Мария Николаева оскуола оҕолоругар тэрийэн ыытта. Бу туһунан Мария Пудовна бу курдук кэпсээтэ:

— Ыам ыйын 6 күнүгэр өрөспүүбүлүкэ судаарыстыбаннай уонна уопсастыбаннай диэйэтэлэ Варвара Петрова аатынан оскуола-саад алын сүһүөх кылааһын үөрэнээччилэригэр  «Мин Үөдэйим хорсун буойуннара» диэн ааттаах көрсүһүүнү ыыттым. Онно бэйэм суруйбут кинигэбин билиһиннэрдим.

Улуу Кыайыы күнэ сыл-хонук ааһан истэҕин аайы Арассыыйа бары олохтоохторугар дириҥ өйдөбүллээх  ытык күн буоларын  быһаардым.

 Оҕолор хос эһэлэрин хаартыскаларын көрдөрөн туран, кинилэр тустарынан тугу билэллэрин кэпсээтилэр.

Сэрии киһи олоҕор куһаҕантан атыны аҕалбатын, билигин буола турар быһыы-майгы тула  кэпсэттибит. Оҕолорго, учууталларга кинигэбин бэлэх туттардым.

Сүрдээҕин сэҥээрдилэр, аахтылар, бэйэлэрин хаартыскаларын көрөн үөрдүлэр.

Маннык истиҥ көрсүһүүлэртэн оҕолор элбэҕи билэллэр, толкуйдуурга үөрэнэллэр.

Бу тэрээһинтэн оҕолор Аҕа дойду сэриитин туһунан билиилэрин кэҥэттилэр, сэрии кэмигэр тыыл бэтэрээннэрэ — кинилэр хос эһэлэрэ уонна эбэлэрэ  үлэнэн эйэлээх олоҕу уһансыбыттарын билэн, кинилэргэ дириҥ ытыктабыл үөскүүр.

Ыарахаттартан чаҕыйбат буола улааталларыгар Үөдэй ытык кырдьаҕастара, кырачааннар чугас дьонноро холобур буолаллар.

Бу маннык истиҥ көрсүһүүлэри оҕолорбут Ийэ дойдуларыгар бэриниилээх буола улааталларын туһугар тиһигин быспакка ыытыы — кэм ирдэбилэ.