Ньурбаҕа ала буурҕа, дохсун ардах түстэ

Бүгүн эбиэттэн киэһэ Ньурба улууһугар ала буурҕа, дохсун ардах түспүтүн туһунан социальнай ситимнэринэн тарҕанна.

Күүстээх тыал түһэн Ньурбачааҥҥа подстанция сууллубут, Антоновкаҕа баҕаналар тостубут, киин уулуссаҕа ыал дьиэтин сарайа кэлэн түспүт. Чаппандаҕа дьиэ сарайа бөҕө көппүт,  оскуолаларын сынньанар олоппостоох ыскамыайкалара ыал тиэргэнигэр көтөн кэлэн түспүттэр. Күндээдэҕэ подстанция умайбыт. Ньурбаҕа уот, сибээс лииньийэлэрэ быстыбыттар, дьон сарайа, олбуора, батуттара көппүттэр.

Уот баран ыаллар холодильниктара, ларьдара ирэн эрэрин туһунан, уоттара хаһан оҥоһулларын туоһулаһан суруйаллар.

Ньурба улууһун олохтооҕо Ольга бу курдук кэпсиир:

— Эмискэ дохсун ардахтаах ала буурҕа түһэн сири-дойдуну бүтүннүү ытыйда. Уоппут, сибээспит барда, ыстаансыйа умайда, мастар, баҕаналар суулуннулар. Ыаллар сарайдара, олбуордара көппүт. Биһиги Байыаннай дьайыы кыттыылаахтарыгар, бэтэрээннэригэр анаммыт тэрээһиммитин ардах-буурҕа быыһынан ыыттыбыт.