Ньурбаҕа бөрөлөр сүүрбэччэ сылгыны тартылар

Ньурба улууһугар бөрө ахсаана икки төгүл элбээтэ. Ардай аһыылаахтар ахсынньыттан саҕалаан номнуо сүүрбэччэ сылгыны тартылар. Бу туһунан СИА-ҕа улуустааҕы тыа хаһаайыстыбатын департаменын салайааччы Леонид Ушканов иһитиннэрдэ.

«Улууспутугар бөрө өрө туруута сыллата буолар. Ол эрээри быйыл ордук наһаалаатылар, икки төгүл элбээбиттэр. Билиҥҥитэ дэриэбинэҕэ киирбиттэрэ бэлиэтэнэ илик. Бөрөлөрү Маалыкай, Күндээдэ, Ынахсыт, Ньурбачаан уонна Малдьаҕар сэлиэнньэлэрин чугаһыгар көрбүттэрэ биллэр. Тохсунньуга аҕыс бөрөнү бултаабыттара», — диэн Леонид Ушканов этэр.

Сылгыны тардыы үгүс түбэлтэтэ Күндээдэ аттыгар буолбут. Онон нэһилиэккэ ыксаллаах быһыы-майгы эрэсиимэ биллэрилиннэ.

Ньурба оройуонун дьаһалтата хас биирдии өлөрүллүбүт бөрө иһин 10 тыһыынча солкуобайы төлүөҕэ. Итиэннэ «Сахабулт» иһинээҕи хампаанньата тирии аайы 20 тыһыынча солкуобайы төлүүрүн иһитиннэрбит.