Ньурбаҕа бырабыыталыстыба отчуота «Кыайыы Знамятын» өрө көтөҕүүнэн түмүктэннэ

Саха Өрөспүүбүлүкэтин Бырабыыталыстыбатын 2024 сыллааҕы үлэтин отчуоттуур бөлөх Ньурба улууһугар оробуочай сырыыта олунньу 20 күнүгэр үөрүүлээх тэрээһини кытары дьүөрэлэстэ.

Ол курдук, түмүктүүр отчуокка кэлбит Ньурба куорат олохтоохторо Аҕа дойду Улуу сэриитигэр Кыайыы 80 сылыгар аналлаах «Кыайыы Знамята» кинилэр улуустарыгар кэлбитин дьиҥнээх  туоһуларынан буоллулар.

Оробуочай бөлөх салайааччыта, СӨ Бырабыыталыстыбатын бэрэссэдээтэлин солбуйааччы Георгий Степанов Ньурба улууһун устуоруйатыгар киирэр бу бэлиэ күн улуус ытык кырдьаҕастарыгар, тыыл бэтэрээннэригэр Анна Марковна Шадринаҕа, Трофим Елисеевич Гаврильевка, Николай Ильич Саввиновка «Кыайыы 80 сылынан» үбүлүөйдээх мэтээллэри туттарда.

Ситэриилээх былаас уорганнарын отчуоттуур мунньахтарыгар үс күн устата — 1226,  биирдиилээн кэпсэтиигэ 92 киһи кытынна. Ону таһынан, нэһилиэнньэ  ситэриилээх былаас, өрөспүүбүлүкэ министиэристибэлэрин, кэмитиэттэрин бэрэстэбиитэллэрин кытары тус көрсөн, боппуруостарын быһаарыста, сүбэ-ама ылла.

Николай Харитонов-Чуор аатынан «Кыталык» Култуура дьиэтигэр буолбут отчуокка куорат олохтоохторун ыйытыылара, кыһалҕалара улуус нэһилиэктэрин дьонуттан  арыый уратылардаах буолла. Ол эрээри, манна эмиэ гаас киириитин, оскуолалары, уһуйааннары тутуу, сыана ыарааһынын  боппуруостара инники күөҥҥэ тутуллаллар. Холобур, Убайаан орто уонна Ньурба куорат 3 нүөмэрдээх начаалынай оскуолалара саҥа дьиэ тутулларын туруорсубуттара уонна күүппүттэрэ быданнаабыт (ол иһигэр, сорох нэһилиэктэргэ 1-кы  кылааска киирэр оҕо суоҕа, ол нэһилиэги эстэр кутталга тириэрдиэн сөбө этилиннэ).

Улуус баһылыга Алексей Иннокентьев мунньахха быһаарбытынан,  өрөспүүбүлүкэ бырабыыталыстыбатын уурааҕынан судаарыстыбаннай-чааһынай уонна муниципальнай-чааһынай бииргэ үлэлээһининэн тутуулар билиҥҥитэ тохтотуллубуттар. Үөрэх эбийиэктэрин тутууга федеральнай бырагырааманан үп көрүллүбэт. Онон былааннаммыт уонна  саҕаланан испит үлэлэри олоххо киллэрэр суоллары толкуйдааһын, торумнааһын кэмэ кэлбит. Тоҕо диэтэххэ, сыана эмискэ үрдээһинэ элбэх былааны атахтыыр кутталлаах.  Өрөспүүбүлүкэҕэ сыл аайы үөрэхтээһин уонтан тахса эбийиэгэ тутуллан үлэҕэ киллэриллибититтэн 2024 сылга Үөдэйгэ оскуола-уһуйаан дьиэтэ үлэҕэ киллэриллэн, төрөппүттэр үөрүүлэрэ улахан.

Дьиэ-уот, хомунаалынай хаһаайыстыба тэрилтэлэрин улууска биэрии хайдах буолуоҕун, куоракка 4 микрооройуон баарыттан «Березовкаҕа» уоту киллэрии, саахал тахсар түбэлтэтигэр саппаас ыстаансыйа наадатын уо.д.а. боппуруостары туруордулар. Улуус баһылыга Алексей Иннокентьев  нэһилиэнньэҕэ  «субсидия эрэ баар буоллаҕына сайдабыт» диэн өй-санаа суох буолуохтааҕын санатта.

Георгий Степанов хас биирдии нэһилиэккэ мунньаҕы түмүктүүрүгэр ситэриилээх былаас отчуоттара тоҕо наадалаахтарын сиһилии быһаарда. Бу отчуот эрэ буолбакка, нэһилиэнньэни кытары аһаҕас кэпсэтии, сүбэлэһии, бырабыыталыстыба үлэтигэр нэһилиэнньэ өттүттэн итэҕэһи-быһаҕаһы ыйан туран, сонун этиилэри киллэрии уо.д.а. Оттон нэһилиэк дьоно эмиэ «Сылга биирдэ буолар отчуокка этиммэтэхпитинэ… уонна хаһан?» -– диэн аһаҕастык этэллэрин хаста да иһиттим. Кырдьыга да оннук. Ол курдук, Ньурба куорат олохтооҕо байыаннай дьайыыга өлбүт уолугар ылыахтаах төлөбүрдэрэ хойутаан кэлэрин, ону уонна наҕараадатын ылар туһугар тоҕо төрөппүт бэйэтэ сүүрүөхтээҕин, онуоха төһөлөөх харах уута тохторун, сыра-сылба баранарын уо.д.а. тууйуллубут санаатын аһаҕастык  этэн, барыбытын долгутта. Георгий Степанов,  өрөспүүбүлүкэтээҕи биэдэмистибэлэр икки ардыларынааҕы хамыыһыйа бэрэссэдээтэлин быһыытынан, хонтуруолга ыларга эрэннэрдэ.

Онтон хамсык кэмигэр төрөппүт ийэтин сүтэрбит эдэр ийэ морг кыһалҕатын бэйэтинэн билбитин бэлиэтээн туран, куоракка морг дьиэтэ уонна быраһаайдаһар саала баар буолар кыаҕын ыйыталаста. Георгий Степанов Ньурба куоракка балыыһа иккис уочарата тутуллан үлэҕэ киирдэҕинэ, урукку балыыһа дьиэтигэр морг хоһун оҥоруохха сөбүн, онон муниципальнай тэриллиини эбэтэр урбаанньыттары кытары үлэлэһэргэ сүбэлээтэ.

Мунньах түмүгэр улуус бастыҥ үлэлээх дьонугар министиэристибэлэр наҕараадаларын туттардылар. Ньурба куорат олохтоохторо ситэриилээх былаас отчуотун биһирииллэрин биллэрдилэр.

Мунньах бүтүүтэ киэһэ хойут өрөспүүбүлүкэ ситэриилээх былааһын отчуотун түмүктэринэн уонна СӨ Ил Дархана Айсен Николаев стратегическай ыйаахтарынан сүбэ мунньах буолла. Манна улуус нэһилиэктэрин баһылыктара бары кытыннылар.