Ньурбаҕа федеральнай трассаҕа массыынаҕа икки киһи хаайтарбытын быыһаатылар

Кулун тутар 4 күнүгэр «Бүлүү» федеральнай айан суол трассатыгар «Mazda» массыына алдьаммытын туһунан иһитиннэрии киирбит.

Массыынаҕа көмөҕө наадыйар икки киһи хаайтарбыт. Салгын температурата -45°С тымныы буолбут.

Саха сиринээҕи Быыһыыр сулууспатын пресс-сулууспата иһитиннэрэринэн, быһылаан тахсыбыт сиригэр Ньурба оройуонун икки быыһааччыта айаннаабыт.

Ньурбаттан 10 км тэйиччи алдьаммыт массыынаҕа тиийэн быыһааччылар массыынаны автосервискэ тиэйэн илдьибиттэр, оттон дьону Ньурба гостиницатыгар хаалларбыттар. Эмсэҕэлээбиттэр мэдиссиинэ көмөтүгэр наадыйбатахтар.