Ньурбаҕа хочуолунайга эр киһини быһаҕынан анньан өлөрбүттэр

Саха сиринээҕи Силиэстийэлиир кэмитиэтин Ньурбатааҕы оройуоннар икки ардыларынааҕы силиэстийэлиир отдела Ньурба куоратын 57 саастаах олохтооҕо киһини өлөрүүгэ холуобунай дьыалатын тэрийдэ. Бу туһунан Саха сиринээҕи Силиэстийэлиир кэмитиэтин пресс-сулууспата суруйар.

Силиэстийэ түмүгүнэн, 2025 сыл олунньу 22 күнүгэр буруйданааччы биир идэлээхтэрин кытта хочуолунай иһигэр арыгы испиттэр. Биир кэмҥэ буруйданааччы иирсээн кэмигэр эр киһини  быһаҕынан түөһүгэр анньыбыт. Бааһырбыт эр киһи быһылаан тахсыбыт миэстэтигэр тутатына өлбүт.

Икки атын дьон мэдиссиинэ уонна полиция үлэһиттэрин ыҥырбыттар. Буруйданааччыны силиэстийэлээччигэ тутан илдьибиттэр. Олунньу 23 күнүгэр силиэдэбэтэл этиитинэн, суут буруйдааҕы хаайарга быһаарыы ылынна.  Холуобунай дьыалаҕа силиэстийэлиир үлэлэр ыытыллаллар.