Ньурбаҕа матасыыкыллар харсыһыыларыгар үс киһи тыына быһынна

Бэс ыйын 23 күнэ үүнэр түүнүгэр Ньурба улууһун Быһыттаах сэлиэнньэтигэр матасыыкыллар харсыстылар. Саахал түмүгэр үс оҕо тыына быһынна. Ол туһунан СӨ Силиэстийэлиир кэмитиэтэ иһитиннэрэр.

Барыллаан иһитиннэриинэн, «Чуукаар-Быһыттаах» хайысханан түүн 02:30 чааска 19 саастаах суоппар «Regulmoto Crossroad-1» матасыыкылы ыытан иһэн утары балаһаҕа тахсан, 18 саастаах суоппар ыытан испит «Regulmoto sk-150-6» матасыыкылын кытта харсыспыт. Харсыһыы түмүгэр суоппардар иккиэн уонна 16 саастаах пассажир суорума суолланнылар. 18 саастаах пассажир кыыс балыыһаҕа киирдэ.

Суоппардар ыытар бырааптара суох, матасыыкыллара регистрацияламматах. Саахалга түбэспиттэр бары шлема суох айаннаан испиттэр.

Быһылаан миэстэтигэр силиэдэбэтэл уонна суһал бөлөх үлэлиир.