Ньурбаҕа ньиэмэс кууруссаларын аҕаллылар

Ньурбатааҕы көтөр фабрикатыгар кууруссалар саҥа баартыйаларын  аҕаллылар. Ол курдук, Дьокуускайдааҕы көтөр фабрикатыттан 49 680 устуука «Ломан Браун» диэн ньиэмэс боруодалаах кууруссаны ыллылар. 

Маны тэҥэ, куурусса сүрүн аһылыгын — бурдугу кыһыҥҥы суолу баттаһа, тиэйэн бүтэрэн эрэллэр. Барыта 700 туонна кэлиэхтээҕиттэн, билигин 2 вагон, ол эбэтэр 120 туонна кэлэрэ хаалла. Бу туһунан Бэтэринээрийэ департамена иһитиннэрэр.

— Нэһилиэнньэттэн сайаапка хомуйан, 260 эдэр кууруссаны аҕалан, түҥэттибит, сорохторго дьиэлэригэр тиэрдэн биэрдибит. Бэл, Өлөөн улууһун Ээйик сэлиэнньэтигэр 50 кууруссаны тиэрдиэхпит. Дьон бэйэ хаһаайыстыбатыгар кууруссаны иитээри, олус наадыйар. Сайыны быһа сибиэһэй сымыыты сииллэр, — диэн көтөр фабрикатын дириэктэрэ Петр Гаврильев санаатын үллэһиннэ.

Ньурбатааҕы көтөр фабриката 2007 сыллаахха тэриллибитэ. Бүлүү умнаһын улуустарыгар соҕотох көтөр фабриката буолар. Онон Бүлүү бөлөх улуустарын, бырамыысыланнай Мииринэй, Ленскэй куораттары куурусса этинэн, сибиэһэй сымыытынан хааччыйар.