Ньурбаҕа «Оҕо Дьулаах Бухатыыр» олоҥхону сыанаҕа туруоруохтара

Эһиил Ньурба улууһа 200 сылыгар анаан Ньурбаҕа «Оҕо Дьулаах Бухатыыр» олоҥхоттон муусукалаах олоҥхо испэктээх оҥорон туруоруохтара. Бу туһунан «Ньурба уоттара» хаһыат биллэрэр.

Туруоруу либреттота суруллан номнуо эрэпэтииссийэ саҕаламмыт. XIX-XX үйэлэргэ үгүс аатырар олоҥхоһуттар туойбут олоҥхолоро “Оҕо Дьулаах бухатыыр” аныгылыы көрүүнэн саҥа тыыннаныаҕа. Бүлүү эҥэр «кыыс кэрэ куоластааҕынан» аатырбыт олоҥхоһут Спиридон Петров — Чыычаах репертуарыгар бу олоҥхо баара эбитэ үһү. Онон бу олоҥхо испэктээк кини 130 сааһын бэлиэтиир тэрээһиҥҥэ эмиэ ананар.

Сүрүн режиссерунан  СӨ искусствотын үтүөлээх диэйэтэлэ, Александр Васильевич Титигиров буолбут. Либретто ааптарынан РФ култууратын үтүөлээх үлэһитэ, этнограф, тойуксут Афанасий Семенович Федоров буолар.