НЬУРБАҔА СПОРТ КҮННЭРЭ

НЬУРБАҔА СПОРТ КҮННЭРЭ

Ааптар:
09.12.2022, 15:45
Бөлөххө киир:

2027 с. Ньурба улууһугар  күүтүүлээх Саха сирин норуоттарын IX Спортивнай оонньуулара ыытыллара былааннанар.

Ол чэрчитинэн, ахсынньы саҥатыгар Саха Өрөспүүбүлүкэтин бырабыыталыстыбатын бэрэссэдээтэлин солбуйааччы, Спортивнай оонньуулары тэрийэр кэмитиэт бэрэссэдээтэлэ Сергей Местников тиийэ сырытта. Итиэннэ миниистир Леонид Спиридонов салайааччылаах СӨ физическэй култуураҕа уонна успуорка министиэристибэтин күннэрэ ыытылыннылар.

Өрөспүүбүлүкэ дэлэгээссийэлэрэ

Үлэлиир бөлөхтөр Спортивнай оонньууларга бэлэмнэнии хаамыытын, Сүлэҕэ, Күндээдэҕэ, Чаппандаҕа тутуулар хайдах баран иһэллэрин көрдүлэр-иһиттилэр. Чаппандаҕа икки этээстээх таас оскуола үөрүүлээх быһыыга-майгыга аһыллыытын түгэнигэр, мобилизацияҕа сылдьар буойуттар дьиэ-кэргэттэригэр аналлаах Аһымал акциятыгар  кытыннылар.

Ити дьаһалларга Саха Өрөспүүбүлүкэтин Аҕа Баһылыгын сүбэһитэ, боксаҕа Олимпийскай оонньууларга боруонса призер Георгий Балакшин, Ил Түмэн депутата Владимир Прокопьев, СӨ Үөрэх уонна наука миниистирин 1-кы солбуйааччы Алевтина Аргунова, СӨ физическэй култуураҕа уонна маассабай успуорка управлениетын начаалынньыга Роман Оконешников, Ньурба оройуонун  баһылыга Алексей Иннокентьев, улуус дьаһалтатын баһылыгын солбуйааччылара, оройуон физическэй култуураҕа уонна успуорка управлениетын начаалынньыга, эппиэттээх үлэһиттэр кыттыыны ыллылар.

Көҥүл тустууга өрөспүүбүлүкэ сүүмэрдэммит хамаандатын тириэньэрэ, аан дойду чөмпүйүөнэ Герман Контоев, өрөспүүбүлүкэ чэпчэки атлетикаҕа сүрүн тириэньэрэ, марафоҥҥа аан дойду Кубогын кыайыылааҕа Василий Спиридонов, өрсөпүүбүлүкэ боксаҕа оскуолатын дириэктэрэ Максим Куприянов, “Кыайыы 50 сыла” спорт дыбарыаһын волейболга тириэньэрэ Аркадий Ефремов маастар-кылаастары көрдөрдүлэр, семинардары  оҥордулар. Мини-футболга табаарыстыы көрсүһүүгэ олохтоохтор СӨ Успуорка министиэристибэтин хамаандатын 2:1 баһыйдылар. Нэһилиэнньэни, уопсастыбаннаһы кытта дьыалабыай кэпсэтиилэр буоллулар.

Түмүккэ Спортивнай оонньууларга бэлэмнэниигэ уонна ыытыыга тэрийэр кэмитиэт сүбэ мунньаҕар иһитиннэриилэр, соруктар, ыйыылар-кэрдиилэр оҥоһулуннулар

Бэлэмнэнии үлэ көхтөөхтүк барар

Успуорка уонна култуураҕа баай үтүө үгэстэрдээх Ньурба улууһугар өр кэтэспит баҕа санаалара олоххо киллэриллэн эрэллэриттэн үөрэллэр. Социальнай-экэнэмиичэскэй хайысхаларга сэргэхсийии тахсан эрэрэ харахха быраҕыллар. Саҥа тутуулар хото ыытыллаллар. Сиэдэрэй оҥоһуулаах оскуолалар, оҕо уһуйааннара, успуорт комплекстара олоххо киллэриллэллэр. Федеральнай айан суолугар олорор бөһүөлэктэр уулуссаларын аспааллыыллар Оройуон бастыҥ дьоннорун үтүө ааттарын үйэтитиигэ, духуобунаска, музейдарга болҕомто күүһүрбүт. Номоххо киирбит Ньурбатааҕы норуодунай тыйаатыр саҥа дьиэлэнэн-уоттанан куораты киэргэтэр.

Сорук-былаан элбэх

Олор тустарынан IX Спортивнай оонньуулары бэлэмниир-ыытар СӨ тэрийэр кэмитиэтин, СӨ физическэй култуураҕа уонна успуорка министиэристибэтин, Ньурба оройуонун дьаһалтатын холбоһуктаах сүбэ мунньахтарыгар кэпсэтиилэргэ этилиннэ.

2021 сыл ахсынньы 29 күнүнээҕи Саха Өрөспүүбүлүкэтин Ил Дархана Айсен Николаев 2027 с. от ыйын 7-11 күннэригэр Ньурбаҕа Саха сирин норуоттарын IX Спортивнай оонньууларын ыытар туһунан дьаһалыгар Оонньуулар балаһыанньалара уонна өрөспүүбүлүкэ тэрийэр кэмитиэтэ бигэргэммиттэр. Оонньуулар бырагыраамаларын бырайыагар аэробика, баскетбол, волейбол, мини-футбол, чэпчэки атлетика, ол иһигэр, паралимпийскай уонна сурдлимпийскай бырагыраама, остуол тенниһэ, көҥүл тустуу, дуобат, саахымат, оҕунан ытыы, буулдьанан ытыы, спортинг, бокс, ГТО многоборьета,  ат сүүрдүүтэ курдук спорт көрүҥнэрэ бааллар. Өрөспүүбүлүкэ бары улуустарыттан уонна оройуоннарыттан 5000 кэриҥэ кыттааччы кэлиэҕэ.

Ньурба куоратыгар тутуллар 3000 олорор миэстэлээх, аныгылыы бүрүөһүннээх сүүрэр  суоллаах стадиоҥҥа уонна физкультурнай-чэбдигирдэр комплекска (көҥүл тустуу, аэробика, чэпчэки атлетика, ГТО многоборьета, мини-футбол, баскетбол); “Олимп” уонна Чаппанда спортивнай комплекстарыгар  (волейбол, ); Убайаан сыалы ытыыга аналлаах былаһааккатыгар (спортинг); Антоновка сыалы ытыыга комплексыгар (буулдьанан ытыы); А.И.Иванов аатынан спортивнай саалаҕа (бокс); ипподромҥа (ат сүүрдүүтэ); Сүлэ спорт саалатыгар (дуобат, саахымат); Күндээдэ спорт саалатыгар (остуол тенниһэ); Чаппандаҕа (оҕунан ытыы) күрэхтэһиилэр буолуохтара.

Спортивнай оонньуулары ыытыы чэрчитинэн икки сүрүн успуорт эбийиэктэрэ: чэпчэки атлетикаҕа сылаас манежтаах кыһыҥҥы стадион уонна бассейннаах физкультурнай-чэбдигирдэр комплекс Ньурба куоратыгар тутуллуохтара.

Тэрийэр кэмитиэт бэлиэтээһиннэрэ

Тэрийэр кэмитиэт бэрэссэдээтэлэ Сергей Местников иһитиннэрбитинэн, бу сыл хаалбыт кэмигэр Оонньууларга бэлэмнэниигэ бары бэлиэтэммит дьаһаллар тустаах министиэристибэлэри кытта сөбүлэһилиннилэр, итиэннэ Өрөспүүбүлүкэ Ид Дарханынан бигэргэниэхтэрэ. Болҕомто федеральнай үбүлээһини ситиһиигэ ууруллуоҕа. Онньуулар балаһыанньаларыгар, сүүмэрдэммит хамаандалары бэлэмнээһиҥҥэ, Ньурба оройуонун нэһилиэнньэтин кытыннарыыга киэҥ өрүттээх үлэлэр күүтүллэллэр. Саҥа интэриэһинэй сүүрээннэри, хайысхалары киллэриигэ успуорт уонна инновация министиэристибэлэрэ ылсыахтаахтар. Холобур, Уһук Илин хамаандаларын кытыннаран, онно эбии, кыайыыны ситиһэн, күрэхтэһиилэр күүрээннэрин үрдэтиэххэ эмиэ сөп.

Ньурба оройуонун баһылыга Алексей Иннокентьев этэринэн, тэрийэр кэмитиэт уонна успуорт министиэристибэтин дэлэгээссийэлэрин холбоһуктаах сырыылара  көдьүүстээх буолла. Бу ааспыт күһүн Ил Дархан Айсен Николаев кэлэ сылдьыаҕыттан, Оонньууларга бэлэмнэниигэ тэрийэр кэмитиэт уочараттаах үһүс түмсүүтэ буолла.  Оройуон хас биирдии олохтооҕо улахан тутуулар бара туралларынан сүргэлэрэ көтөҕүлүннэ. Дьон-сэргэ санаата түмүллэн, биир тыынынан олорор. Аҥардас, стадион да тутуутун кэтэспиттэрэ ыраатта. Үбүлээһини булуу, үлэни сааһылааһын бэрээдэктэнэр. Онуоха, оройуон тус кылаатын киллэрсэр.

Ньурбалар төрүт былыргыттан кус быһый, ат күүстээх дьоннордооҕунан биллэллэр. Успуорт куттаах оройуон. Атах оонньуутугар бэйэтин кэмигэр тэҥнээҕэ суох, номоххо киирбит Николай Санников, хотторору билбэтэх бөҕөс Юрий Андреев, боксаҕа Олимпийскай оонньуулар медалиһа Георгий Балакшин, аан дойду, Европа кыайыылаахтара Александр Иванов, Владислав Андреев бүтүн Сахабыт сирин киэн туттуулара. Онон, успуорка аналлаах баараҕай тутуулар хайаан даҕаны баар буолуохтаахтар. Өрөспүүбүлүкэ өйөбүлэ, көмөтө баара үөрдэр, астыннарар. Инньэ гынан, физическэй итиигэ уонна успуорка, чөл олоҕу тутуһууга, ыччаты дойдуга бэриниилээх буолуу тыыныгар иитиигэ сүрүн болҕомто ууруллар. Аныгылыы өйдөөх-санаалаах нэһилиэнньэ тупсаҕай, бары өттүнэн толору хааччыллыылаах олоххо, таһаарыылаах үлэҕэ-хамнаска тардыһар. Оройуон салалтата бары кыаллары-кыаллыбаты быһаарарга, тэрийэргэ, оҥорорго кыһаллар.

Саха Өрөспүүбүлүкэтин физическэй култуураҕа уонна успуорка миниистирэ Леонид Спиридонов Оонньууларга бэлэмнэнии тэрийэр кэмитиэтин кытта үлэ көхтөөхтүк барбытын уонна бара турарын, үлэ сүрүн хайысхалара тобуллубуттарын, олохтоохтор, салалта бэйэлэрин үчүгэй өттүнэн көрдөрбүттэрин, маассабай успуорка элбэх бырайыактар баалларын, далааһыннаах тэрээһиҥҥэ бэлэмнэниигэ былааннарын кэпсээтэ. Спортивнай тутуулар олоххо киллэрилиннэхтэринэ Ньурбаҕа улахан Арассыыйа, норуоттар икки ардыларынааҕы таһымнаах күрэхтэһиилэри, турнирдары ыытар кыахтар үөскүүллэрин иһитиннэрдэ.

Түмсүүлээх үлэ барыаҕа

Ньурбаҕа сырыы түмүгүнэн, оройуоҥҥа физическэй култуураны уонна успуорду сайыннарыыга Леонид Спиридонов уонна Алексей Иннокентьев биэс сыл болдьохтоох бииргэ үлэлээһин Сөбүлэһиитин түһэристилэр. Онон Ньурба улууһа кэскиллээхтик сайдарыгар киэҥ олук уурулунна.

Саха сирин норуоттарын IX Спортивнай оонньууларыгар бэлэмнэнэргэ уонна ыытарга өрөспүүбүлүкэ экономикаҕа, тутууга, үөрэххэ уонна наукаҕа, култуураҕа уонна духуобунай сайдыыга, тырааныспарга, успуорка уонна суол хаһаайыстыбатыгар, физическэй култуураҕа уонна успуорка министиэристибэлэрин, Ньурба оройуонун дьаһалтатын иннилэригэр улахан эппиэтинэстээх соруктар тураллар.

Баһылай Посельскай.

Лента
Салгыы
31 января
  • -45°C
  • Ощущается: -45°Влажность: 65% Скорость ветра: 1 м/с

Сообщить об опечатке

Текст, который будет отправлен нашим редакторам: