Ньурбаҕа сүппүт оҕону буллулар

Эрдэ, атырдьах ыйын 18 күнүгэр киэһэ Ньурба улууһугар 2010 с.т.  оҕо пиэрмэҕэ матасыыкылынан баран иһэн сүппүтүн, дьиэтигэр кэлбэтэҕин туһунан суруйбуппут. Сүппүт оҕону көрдөөччүлэр кэлин суолтан матасыыкылы булбуттара.

Бүгүн, көрдөөһүҥҥэ СӨ Быыһыыр сулууспатын Ньурбатааҕы көрдүүр-быыһыыр этэрээтин үс быыһааччыта көрдүү тахсыбыттара.

Киэҥ далааһыннаах көрдөөһүн түмүгэр, сүппүт оҕо Өҥөлдьө сэлиэнньэтин (Марха нэһилиэгэ) биир ыалын уһаайбатыгар, окко утуйа сытарын буллулар. Оҕо туруга үчүгэй диэн СӨ Быыһыыр сулууспата иһитиннэрэр.