Ньурбаҕа туристары балыксыттар быыһаатылар

Ньурба улууһугар Марха өрүскэ туристар бөлөхтөрө хаайтарбыттар. Бэһиэ буолан икки мотуордаах оҥочонон айаннаан истэхтэринэ, биир оҥочолоро алдьаммыт. Онон туристар сатаан киин сиргэ кэлбэккэ, көмө көрдөөбүттэр. Бу туһунан СӨ Быыһыыр сулууспата иһитиннэрэр.

Быыһааччылар балаһыанньаны хонтуруолга ылбыттар, ол эрээри туристары балыксыттар быыһаабыттар.

Быһылаан буолбутун туһунан балаҕан ыйын 16 күнүгэр 11:39 чааска иһитиннэрбиттэр. Бөлөх Марха өрүс хаҥас биэрэгэр баар Чуумпурук диэн метео-ыстаансыйаттан 50 м тэйиччи сылдьыбыт. Бу Ньурба куораттан 145 км ыраах баар. Метео-ыстаансыйа аттыгар чугаһынан нэһилиэнньэлээх пуун суох.

Биир оҥочо алдьаммытыгар, туристартан биирдэстэрэ иккис оҥочонон айаннаабыт. Атыттар эвакуацияланалларын күүтэ хаалбыттар. Ол күн кинилэри балыксыттар быыһаабыттара биллибит. Туристары Маалыкайга тиэрдибиттэр.