Ньурбаҕа тустуу саалата, интэринээт уонна тир тутуллуохтара
![](https://sakha-sire.ru/wp-content/uploads/2024/02/68969e520fe9cb3c2b76f10ce18e2d4b04fa0361-1060x596.jpeg)
СӨ вице-премьера Георгий Степанов салайааччылаах өрөспүүбүлүкэ ситэриилээх былааһын уорганнарын оробуочай бөлөҕө бырабыыталыстыба 2023 сыллааҕы отчуотун Ньурба улууһугар ыытар.
Отчуот Ньурба улууһун Антоновка нэһилиэгэр буолла. Нэһилиэк улахан – нэһилиэнньэтин ахсаана 4 тыһыынча кэриҥэ киһи. Онно 188 үөрэнээччилээх оскуола эбии дьиэтэ уонна 150 миэстэлээх оҕо уһуйаана тутуллар. Ону таһынан Саха сирин норуоттарын IX успуорка ооньууларын көрсө Антоновкаҕа саҥа тустууга успуорт саалалаах интэринээт уонна буулдьалаах саанан ытар тир тутуллуоҕа.
Санатан эттэххэ, дойду Бэрэсидьиэнэ Владимир Путин 2030 сылга диэри Арассыыйа олохтоохторо 70%-нын успуордунан дьарыктыырга тиһигин быспакка ыытар соругу туруорбута. «Биһиги сорукпут – 2030 сылга диэри успуордунан утумнаахтык дьарыктаныыга дойду олохтоохторун 70 %- нын хабыахтаахпыт. Ол эбэтэр, сааастарыттан уонна доруобуйатыттан тутулуга суох 93 мөл. киһиэхэ успуорт олох нуормата буолуохтаах», — диэн дойду Бэрэсидьиэнэ бэлиэтээбитэ.
Антоновка нэһилиэгин олохтоохторо бырабытаалыстыба үлэтин биир санаанан биһирээтилэр. Өрөспүүбүлүкэ ситэриилээх былааһын уорганнарын оробуочай бөлөҕүн кытта көрсүһүгэ мелиоративнай үлэлэри ыытыы, оскуолаҕа тырахтарыыс-механизатордары үөрэтии боппуруостарын көтөхтүлэр.
Саха Өрөспүүбүлүкэтин уонна Бырабыыталыстыбатын пресс-сулууспата
Сообщить об опечатке
Текст, который будет отправлен нашим редакторам: