Ньурбаҕа үһүс төгүлүн ыт бүрүсүлүөһэ бэлиэтэннэ

Ньурба куоратыгар үһүс төгүлүн ыт бүрүсүлүөһэ бэлиэтэннэ. Бу туһунан СӨ Бэтэринээрийэҕэ департамена иһитиннэрдэ.

Ыарыыны ыт оҕотуттан булбуттар. Бу иннинэ эрдэ саас, муус устар 8 күнүгэр, Ньурбаҕа бүрүсүлүөс ыарыыта эмиэ тура сылдьыбыта. Бары миэрэлэри тутуһуу, ыалдьыбыт ыты утутуу түмүгэр ыарыы тохтотуллубута.

Билигин Ньурба улууһун бэтэринээринэй управлениета бүрүсүлүөс ыарыыны бохсор тэрээһиннэри ыытар.

От ыйын 26 күнүнээҕи туругунан, Саха сирин үрдүнэн бүрүсүлүөс ыарыы үс сиргэ баар: Дьокуускайга, Ньурбаҕа уонна Үөһээ Бүлүүгэ. Уопсайа 17 эпизоотическай очаг баар. Ол курдук, Дьокуускайга — 14, Ньурбаҕа — 2, Үөһээ Бүлүүгэ — 1.  Саҥа эпизоотическай очаг көстүбүтүнэн, дьиэ кыылын тутууга, көрүүгэ-харайыыга бары ирдэбил тутуһуллуохтаах.