Ньурбалар байыаннай дьайыыга сылдьар уолаттарыгар көмө ыыталлар

Байыаннай дьайыыга улуустартан көмө тиһигин быспакка оҥоһуллар. Ньурба улууһун олохтоохторо, тэрилтэлэрэ эмиэ бэйэлэрин кылааттарын киллэрэллэр.

Ньурба улууһун тэрилтэлэрэ байыаннай дьайыы пуондатыгар көмө киирэ турар диэн улуус дьаһалтатын пресс-сулууспата иһитиннэрэр. Итини таһынан урбаанньыттар, тэрээһиннээх хаһаайыстыбалар эмиэ көмөлөһөллөр.

Улуустааҕы киин балыыһа кэллэктиибэ 32 аптечка эми-тому хомуйан биэрдэ. Улуус баһылыга Алексей Иннокентьев салайааччылаах дэлэгээссийэ атырдьах ыйын бүтүүтэ байыаннай дьайыы туһаайыытынан айанныахтаах.

Дэлэгээссийэ Ньурба улууһуттан байыаннай дьайыыга сылдьар байыастарга көмө илдьэн туттарыаҕа. Ньурба улууһун дьаһалтата олохтоохтор уонна атын даҕаны сиргэ олорор биир дойдулаахтарын уолаттарга анаан көмөнү тиксэриэххитин сөп диэн иһитиннэрэр.

Бүгүн Ньурбатааҕы Биисинэс-инкубаторга баар «Көмүскэл» волонтердар сыахтарын иистэнньэҥнэрэ тикпит таҥастарын, бэлэмнээбит наскыларын, кээнчилэрин, уллуҥнары (стельканы), маскировочнай сиэккэлэрин ыыттылар.