Ньурбалар биир дойдулаахтарыгар 5 матасыыкылы илдьиэхтэрэ

Ньурба улууһун дэлэгээссийэтэ Москваҕа үлэлии сылдьар. Биир дойдулаах байыастарыгар илдьээри, 5 матасыыкылы атыыластылар. Бу туһунан улуус дьаһалтата телеграм ханаалыгар  суруйда.

Санатан эттэххэ, бу күннэргэ ньурбалар биир дойдулаахтарын көрсө айаннаабыттара. Улуус баһылыга Алексей Иннокентьев:

—Москва куоракка тиийэн Ньурбаттан илдьэ кэлбит таһаҕаспытын ылан сааһыланныбыт. РФ Бэрэсидьиэнигэр СӨ Бастайааннай Бэрэстэбиитэлэ Андрей Федотовы тиийэн көрүстүбүт, үлэбит сорох өрүттэрин туһунан кэпсэттибит. Бу күннэргэ биир дойдулаахтарбытын көрсө айаҥҥа турунуохпут.  Айаннаан иһэн, Москваҕа уолаттар үлэлиир кэмнэригэр, Санкт-Петербурга элбэх уол госпитальга эмтэнэ сытарын иһин,  РФ Бэрэсидьиэнигэр СӨ Бастайааннай бэрэстэбиитэлин солбуйааччыта Евгений Петровы кытта Санкт-Петербург госпиталларыгар сырыттыбыт. Бааһыран эмтэнэ сытар биир дойдулаах байыастарбытын — Альберт С., Ньургун К., Гаврил С. уонна Андрей Л. көрүстүбүт. Уус Иван Тимофеев үрүҥ көмүстэн оҥорбут харысхалларын, эмчит, алгысчыт Алиса Иннокентьева харысхаллаах маастаах арчылыыр мөһөөччүктэрин, култуура департамена оҥорбут алгыстаах кинигэлэрин уонна дойдуларыттан ыһаарыламмыт собо, ыыһаммыт эт, туустаах тугунуок, күөх луук илдьэн биэрдибит. Уолаттар санаалара бөҕөх, дойдуларын сонунун истэн, кэһии тутан улаханнык үөрдүлэр-сэргэхсийдилэр. Биһиги уолаттарбытыгар кыһамньыларын иһин Евгений Петровка, волонтердарга , биир дойдулаахпытыгар Ирина Мопполова-Чердоноваҕа, итиэннэ волонтердары салайан үлэлэтэ сылдьар Варвара Илларионоваҕа истиҥ махталбытын тиэрдэбит, — диэн  телеграмҥа  суруйбута.