Ньурбалар ойуур баһаарыгар үлэлиир дьонноругар көмө хомуйаллар

Бу күннэргэ Ньурба улууһугар ойуур баһаарыгар үлэлии сылдьар дьонноругар анаан көмө хомуйаллар.

Улуус дьаһалтатын пресс-сулууспата иһитиннэрбитинэн, өрүү буоларын курдук, бастакы өйөбүлү урбаанньыттар оҥордулар.

Ол курдук, Муксуновтар дьиэ кэргэн 200 тахса респиратор-мааска, «Ника» маҕаһыынтан бытовой туттар тэрил, Титовтар дьиэ кэргэн бородуукта тиксэрдилэр.

“От ыйын 26-29 күннэригэр Административнай киин бастакы этээһигэр гуманитарнай көмө пууна арыллан үлэлии турар. Ким туох кыахтааҕынан ыаллыы Үөһээ Бүлүү уонна Ньурбабыт сиригэр баһаардарга үлэлии сылдьар дьоммутугар көмөлөһүөҕүҥ диэн ыҥырабыт”, — диэн улуус дьаһалтатын пресс-сулуспата телеграм-ханаалыгар суруйар.