«Ньурбалар түмсэр түһүлгэлэрэ» үрдүк таһымнаахтык ааста

Ахсынньы 11 күнүгэр Дьокуускай куоракка «Өрөгөй» улахан уораҕайыгар «Ньурбалар түмсэр түһүлгэлэрэ» диэн элбэх биир дойдулаахтарын түмпүт далааһыннаах тэрээһин үрдүк таһымнаахтык тэриллэн ааста.

Сарсыарда 11 чаастан атыы-эргиэн, ас-үөл дьаарбаҥката, биирдиилээн урбаанньыттар, тарбахтарыгар талааннаах норуот маастардарын үлэлэрин көрдөрөр быыстапка тэрилиннилэр. «Саха сүөһүтэ» саха ынаҕыттан бородууксуйа арааһын атыылаан, куоракка олорор биир дойдулаахтара эти, үүт ас арааһын атыылаһан астыннылар.
Ньурбаҕа 2027 сылга ыыттыллыахтаах СӨ lX спортивнай оонньууларын көрсөр тэрээһин улуустааҕы тэрийэр кэмитиэт биир бастакы улахан тэрээһининэн буолла.
Дьокуускай куорат «Өрөгөй» уораҕайыгар бу тэрээһин култуурунай бырагырааматыгар Ньурба улууһуттан элбэх кыттааччы кэллэ. Тэрээһиҥҥэ үлэлэһэр хамаандалар култуура чаҕылхай бырагырааматын икки былаһаакканан тэрийдилэр.
Иккис этээскэ Ньурба нэһилиэктэрэ араас муннуктары, фотозоналары көрдөрдүлэр.
Эрдэттэн биллэриллибит улахан үөрүүлээх тэрээһин 200-тэн тахса кыттааччылаах өрө күүрүүлээхтик арылынна. Ньурбаттан төрүттээх аатырбыт киэн туттар ырыаһыттарбыт кэрэ көстүүнү көрдөрөн сөхтөрдүлэр, көрөөччүлэр сөҕөн, махтанан, биир дойдулаахтарынан киэн туттуулара өссө үрдээтэ.

Бу күн Ньурба улууһун баһылыга Алексей Иннокентьев, нэһилиэктэр баһылыктара, биллэр-көстөр дьоно успуорт lX оонньууларын көрсө успуорка аатырбыт дьоннорун чиэстээтилэр. Ыллыыр талааннаах, Ньурбаттан төрүттээх көхтөөх дьону кытыннаран, бэртээхэй кэнсиэр буолла.
Ньурбаттан биир дойдулаахтарын өйүү тэрээһиҥҥэ кыттааччылар уонна улуус успуорка кэмитиэтэ, спортсменнара — 500 киһи, куоракка олорор биир дойдулаахтарыныын барыта 2 тыһыынча курдук киһи тэрээһиҥҥэ кэлэн, көрөн-истэн кэрэхсээтэ.
Инникитин өссө да күргүөмнээх үлэ Ньурба улууһун дьаһалтатын, нэһилиэктэр баһылыктарын күүтэр. Ону сэргэ, Ньурба улууһун култуураҕа департаменын эппиэтинэстээх үлэтэ ирдэнэрэ чуолкай.

Ол эбээһинэс дьахталлартан бастакы уонна соҕотох Аар Дархан этээччи, СӨ култууратын үтүөлээх үлэһитэ, Ньурба улууһун култуураҕа, ыччат бэлиитикэтигэр департаменын салайааччы, Ньурба улууһун бочуоттаах олохтооҕо Розалия Михайловна Тихоноваҕа сүктэрилиннэ. Далбар Хотун, уопуттаах салайааччы Күөх Ньурба киэн туттар, устуоруйаҕа киирэр дьоһун тэрээһинигэр бэлэмнэнэр үлэни үрдүк таһымҥа ыытар кыахтааҕын көрдөрдө!

Зоя ДАНИЛОВА-КЭКЭРДЭ