Ньурбалар ыаллыы сытар Үөһээ Бүлүү улууһугар көмөлөрүн ыыттылар

Баһаар сезона саҕаланыаҕыттан Саха сирин бары улуустарыттан хомуллан уоту кытары охсуһаллар. Кыһалҕалаах, эмсэҕэлээбит улуустарга ким туох кыахтааҕынан көмөлөһөр.

От ыйын 26-29 күннэригэр ньурбалар Административнай кииҥҥэ Ньурба уонна Үөһээ Бүлүү улуустарыгар ойуур баһаарын утары үлэлии сылдьар дьонноругар анаан гуманитарнай көмө хомуйбуттар. Ол туһунан Ньурба улууһун баһылыга Алексей Иннокентьев телеграмм-ханаалыгар иһитиннэрдэ.

«Улууспут олохтоохторугар ойуур баһаарын утары охсуһа сылдьар дьоммутугар көмөлөһүөххэ диэн ыҥырыы таһаарбыппыт. Ыҥырыыбытын тута ылынан көмөлөспүт тэрилтэлэрбитигэр: Антоновкатааҕы быраас амбулаториятыгар, «Биһик» уһуйааҥҥа, улуус дьаһалтатын үлэһиттэригэр, Тыа хаһаайыстыбатын департаменыгар, Култуура департаменыгар, Ыччат дьыалатын уонна имидж бэлиитикэтин салалтатыгар, «Табыс» бэстибээл кыттыылаахтарыгар, «Ростелеком» Ньурбатааҕы салаатыгар, Кииннэмит бухгалтерияҕа, Норуоттар доҕордоһууларын түмэлигэр, «Ньурба МТС-Агро» тэрилтэлэригэр, урбаанньыттарбытыгар, Муксуновтар, Титовтар дьиэ кэргэннэригэр, «Ника» маҕаһыыҥҥа кэлэктиибигэр, «Байар» кэпэрэтиипкэ өрүү бу курдук кыһалҕаттан туора турбакка күүс-көмө буоларгытыгар улахан махталбытын биллэрэбит», — диэн улуус баһылыга маталын тиэрдэр.

Ойуур баһаарын утары үлэлии сылдьар дьоҥҥо анаммыт гуманитарнай көмөнү бэҕэһээ ыаллыы сытар Үөһээ Бүлүү улуһугар, ону тэҥэ Ньурбачаан уонна Чаппанда нэһилиэктэригэр тиксэрдилэр.